E conocido periodista y presentador, Juby Naar tabata un di e oradornan di e charla riba Cultura di Carnaval. El a splica cu loke el a haci ta, a duna un idea con el a cuminsa na San Nicolas, con el a cuminsa na Playa, con nan dos a uni hunto y a yega te formacion di e CCCA, cu despues, pa motibo di fondo, mester a cambia e comite central di Carnaval Aruba, pa un fundacion.
E stichting cu a bira Stichting Arubaanse Carnaval (SAC) pasobra pa fondo e comite no mag tene actividad di cobra y haya placa.
Pero un stichting si por haci’e, como fundraising. Door di e formacion eynan, a bin haya actividadnan cu nan a cuminsa cobra p’e, estilo Calypso, Calypso & Roadmarch, Tumba y asina a sigui como SAC te cu el a bira SMAC.
Pero e hendenan a haya un idea con henter e cos a bay den otro, manera dos coriente di lama, apart di otro, uni y bira un riu.
Esey ta en realidad locual cu Naar a trece riba e historia di carnaval. Un cos cu e no a mustra, ta ken a siguie na San Nicolas, pa el a keda biba.
El a papia di e Trinidariannan y esnan di e Labor Camp y tambe di e demas islanan Caribense. E Trinidariannan na 1948 y 49 cu nan a participa den dos parada, no a tende mas di nan. Ta e habitantenan di den Village, Rooi Hundo, Yuwana Morto, esnan cu a bin ariba di Zeewijk y den San Nicolas, a organisa nan gruponan di carnaval cu steelband, cu a tene e paradanan di prome cu esey, na bida.
Esey tabata eigenlijk e bida di Carnaval.
Na Playa, Tivoli tabata tin su celebracionnan. Tivoli a bay caya. Es decir rond di Club, te na misa bira rond bin bek club via nan tennisbaan. Despues nan a bay den caya grandi te cu Trappers Social Club di Santa Cruz y di Noord tambe a join cu e parada a bira mas grandi, conoci como e Parada di Playa.
Pero e musica cu nan tabata tin tabata hopi tipico of e conhunto cu Tivoli tabata paga cu tur aña. Hasta tabata tin un banda di Corsou cu tabata toca den fiestanan di Tivoli y despues den paradanan di carnaval di Tivoli.
No tabata tin Tivoli so. Tabata tin Tivoli, Club Antiana, Club Caribe, cu ta e grandinan di Playa e temponan aya y esunnan di p’afo, cu a bin join.
Den e topamento di e dos corientenan, steelband a drenta tambe na Playa y a bin e separacion di diasabra San Nicolas, diadomingo Playa, di manera cu e steelbandnan por a toca pa Mi Grupo na San Nicolas diasabra, pero firma contract tambe na Playa cu Caribe, pa eynan tambe nan gana nan cen.
Door di e dos corientenan ey y e binimento hunto di musiconan, e paradanan a keda locual cu e ta awendia, den un Carnaval di Aruba.
