Charla di Leo Club pa atrae miembro nobo

E organisacion hubenil Leo Club a organisa un charla un informativo pa hobennan di 18 pa 30 aña. E ta specialmente pa hobennan cu kier haci un diferencia pa comunidad di Aruba. Nan por afilia nan mes na LEO Club, e organisacion hubenil di Lions Clubs International, e organisacion di servicio mas grandi na mundo cu mas di 1.4 miyon di miembro.

LEO ta significa Liderazgo, Experiencia y Oportunidad. Miembronan di Clubnan LEO ta reuni, organisa y realisa proyectonan di servicio na bienestar di comunidad. Participando den e actividadnan aki e miembronan ta desaroya nan habilidadnan di liderazgo, ta experiencia cu yuda comunidad ta un oportunidad pa siña enfrenta retonan nobo y e responsabilidadnan cu esaki ta trece cu ne. Ademas e ta alerta nan riba e necesidad cu ta biba den e comunidad.

Aruba One Happy Island Lions Club lo ta organisando un atardi di informacion diasabra 6 di maart entre 4 pm y 5.30 pm na College Zaal EPI situa na Sero Blanco. Si abo ta un hoben cu kier comparti bo idea, bo kier contribui positivamente y traha na bienestar di comunidad y bo kier conoce amistadnan nobo? Sea parti di e bunita proyecto aki y acudi diasabra awo p’asina haya mas informacion, of haya contesta riba cualkier pregunta cu por tin pa cu esaki. Tambe por opta pa sigui e atardi aki via forma digital tambe. Pa mas informacion por bishita e facebook page Aruba One Happy Island Lions Club of email na [email protected].