E hoben Chaim De L’Isle di 21 aña di edad apenas a cuminsa traha na Cafe the Paddock. E tabata liber diabierna y a bay lama cerca di La Quinta. Ora di e accidente e tabata rumbo pa SVb pa inscribi su mes pa seguro social, awor cu el a cuminsa traha “vast”. E nunca a yega SVb, sino mas bien den seccion di Cuido Intensivo na Hospital y a fayece eynan awe marduga.
Chaim tabata gusta core bais, aunke e no ta inscribi na Aruba Wieler Bond ni cerca ningun club di ciclismo. Investigacion ta mustra cu e no tabatin un helm bisti ora di e accidente. Investigacion di Polis ta mustrando cu e tabata coriendo den direccion contrario (verboden) riba e caminda dilanti Alhambra Casino/Costa Linda. E auto tabata coriendo direccion Eagle Beach, mientras cu e bais tabata biniendo direccion contrario y a bay crusa dilanti e auto, pa e bay SVb. Esey ta haci e ciclista mes culpabel di e accidente, aunke Polis ta investigando e chauffeur di e auto, coriendo cu un auto sin documentonan na ordo.
Pa famia di Chaim, e sla ta masha duro. Chaim tin dos ruman mas, Mathieuw studiando na Hulanda y Micha na Aruba. Chaim tabata esun mas jong. Su mayornan a divorcia y como tal su mama a bay biba na Hulanda. E tabata spaar pa cumpra su auto y pa por a sigui studia. Lamentablemente destino a resulta otro p’e.
Nos ta expresa palabranan di hopi forsa na famia di e fayecido den e momentonan dificil aki. Cu Chaim sosega na paz.
