Gabinete Wever Croes a bay di acuerdo cu un extension di e supervision financiero hulandes, CFT, te por lo menos proximo eleccion. Fuera di extende e supervision financiero Hulandes, Evelyn Wever Croes y Xiomara Maduro, a bay di acuerdo cu un reduccion di gastonan di personal nominal y un reduccion di debe tur aña.
E palabra “verlaging personeelskosten” y “beleidsplan verlaging personeelskosten” ta hinca den e acuerdo un total di 7 biaha. Di e prome pagina te cu e ultimo pagina di e acuerdo. Cu esaki, Hulanda a haya un grip mas fuerte riba gobernacion y maneho financiero na Aruba.
Gobierno di Aruba no a logra tampoco pa haya fiansa riba un interes mas abou, manera tabata e intencion expresa for di comienso di e Gabinete aki.
Ta conoci cu awe ta e fecha unda Rijksministerraad di Reino ta reuni. No ta conoci si e hecho cu e reunion lo a tuma luga awe lo ta un motibo cu e acuerdo a wordo cera awe. Si no tabata tin un acuerdo cu Aruba, Hulanda su unico opcion pa extende e supervision financiero lo ta pa pasa un asina yama Algemene Maatregel van Rijksbestuur of un Koninklijk Besluit pa sigura cu e supervision financiero ta keda valido despues di fin di e aña aki. Mirando cu no tin mucho reunion mas e aña aki, probablemente solamente uno, esaki lo tabata un di e ultimo oportunidadnan pa Gobierno Hulandes regla esaki.
Awor cu gobierno di Aruba a bay di acuerdo, no tin necesidad mas pa un plan di contingencia asina.
Pa mas detaye, lesa e protocol completo:
Uitvoeringsprotocol+Aruba+Nederland+2018-2021+-+versie+22+november+2018
