Cft: “Progreso solido rekeri riba diferente tereno”

77

Colegio di Supervision Financiero di Corsou y Sint Maarten (Cft) ta pidi gobierno interino cu insistencia pa realisa progreso riba diferente tereno. Mester aproba e presupuesto di 2020 mas pronto posibel. Ademas mester tuma medida pa controla e gastonan y mehora cobramento di impuesto, di moda cu compensacion di e deficitnan anterior por tuma luga for di 2021.

Tambe ta necesario pa mehora e ciclo di presupuesto y responsabilisacion y reduci e atrasonan grandi den compilacion y aprobacion di e cuentanan anual. Ehecucion di e presupuesto di 2019 A base di e di tres reportahe di ehecucion di 2019 Cft ta constata cu Sint Maarten te y cu september 2019 a realisa un deficit mas abou cu loke a presupuesta anteriormente.

E expectativa ta cu lo cera aña 2019 cu un deficit di ANG 47 miyon compara cu un deficit presupuesta di ANG 71 miyon. Sinembargo, ta keda persistentemente necesario pa tuma mas medida pa aumenta e entradanan y reduci e gastonan, pa realisa surplus presupuestario for di 2021. Proyecto di presupuesto 2020 Cft a ricibi e proyecto di presupuesto revisa di 2020 dia 22 di januari 2020. Esaki ta mustra un deficit presupuestario di ANG 25 miyon y inversion di capital di aproximadamente ANG 62 miyon. Cft a manda su reaccion riba e proyecto di presupuesto 2020 ey dia 5 di februari y a conseha Conseho di Ministro di Sint Maarten pa no laga e proceso presupuestario di 2020 sigui haya mas retraso y pa yega awor rapidamente na un presupuesto aproba.
Mirando e deficit presupuestario di 2019 y e deficit premira pa 2020, Cft a discuti e posicion di likidez di Sint Maarten cu Ministro di Finansa y Conseho di Ministro. Den e caso aki ta na interes di Sint Maarten pa reahusta e deficit hacie bira un surplus structural mas pronto posibel. Aumento di entrada, y particularmente entrada fiscal, ta indispensabel den tal caso. Cft ta keda enfatisa cu restructuracion di Servicio di Impuesto mester tuma luga rapidamente y cu mester implementa medida cu ta reduci gasto.

Maneho financiero For di aña pasa Sint Maarten tin un Plan di Mehoramento di e Maneho Financiero aproba door di Conseho
di Ministro. Sinembargo, den e ultimo periodo no a realisa mehoracion concreto riba e tereno aki. Como causa ta señala e falta di capacidad di ehecucion y financiacion. E situacion aki tin como consecuencia cu e palabracion cu Sint Maarten a haci cu Colegio pa yega na un declaracion aprobatorio di accountant pa e cuenta anual di 2021 lo rekeri un esfuerso adicional considerabel. Cft a pidi Ministro di Finansa di Sint Maarten pa no warda mas cu ehecucion di e plan. Cuentanan anual Sint Maarten a firma contrato pa sosten externo pa compilacion di e cuentanan anual di 2017 y 2018. Sinembargo, e atraso den finalisacion di e trayecto di responsabilisacion pa e añanan 2013 te y cu 2018 t’ey keto bay. Durante su bishita na Sint Maarten Cft a subraya e necesidad di supera e atraso aki pronto.

Esaki ta rekeri accion tanto di Gobierno como di Parlamento. Progreso di e instruccion A base di e instruccion di Conseho di Ministro di Reino na 2015 Sint Maarten mester compensa e deficitnan di pasado, elimina e atrasonan di pago y haci e sistema di cuido di salud y prevision di behes di e pais financieramente sostenibel. Lo por compensa e deficitnan solamente ora cu tin un surplus
presupuestario. Na 2019 e atrasonan di pago a baha cu aproximadamente ANG 50 miyon y a cera acuerdo cu varios acreedor. Sinembargo, ainda e atrasonan di pago restante ta considerabel. Ainda no a presenta e proyecto di legislacion pa reforma di e sistema di cuido di salud na Parlamento. E mesun cos ta conta pa e proyecto di legislacion pa aumento di e edad di pensioen di behes di 62 pa 65 aña. A presenta e revision di legislacion tocante pensioen di empleado publico na Parlamento na october 2018,

pero no a aprob’e ainda. E revision ey ta implica un transicion di salario final pa salario medio y un aumento di e edad pa baha cu pensioen di 62 pa 65 aña. Demas A informa Cft cu a firma e acuerdonan pa financiacion di e trabounan di reparacion di aeropuerto. Ta trata awor di dal rapidamente e siguiente stapnan cu ta necesario pa yega na un aeropuerto cu ta funciona bien y cu por contribui na recuperacion economico mas aleu. Colegio di Supervision Financiero di Corsou y Sint Maarten a bishita Sint Maarten di dia 17 pa dia 20 di februari y a tene reunion cu Gobernador, Ministro di Finansa, Conseho di Ministro, e Representante Hulandes na Sint Maarten reemplasante, organo ehecutivo di Seguro di Cuido Social (SZV), Sint Maarten Medical Center (SMMC), St. Maarten Harbour Holding Company (SMHHC) y Princess Juliana International Airport (PJIA).