Colegio di supervision financiero di Boneiro, Sint Eustatius y Saba (Cft) a spierta tanto Colegio Ehecutivo como Conseho Insular pa mustra mas firmesa.
Cft ta constata pa basta tempo caba cu riba demasiado area Boneiro no ta cumpli cu e normanan legal. Ademas, repetidamente no a cumpli cu palabracion haci cu e entidad publico of no a cumpli cu nan suficientemente. “Si e situacion aki no mehora, un conseho pa instruccion ta inevitabel”, segun Presidente di Cft Raymond Gradus.
Durante e bishita di Colegio diamars dia 16 di october a papia cu Gezaghebber, Colegio Ehecutivo, Conseho Insular y e Representante di Reino suplente. Tambe a haci un bishita di trabou na Servicio di Impuesto di Hulanda Caribense, unda Colegio a haya, entre otro, un splicacion tocante recaudacion di impuesto di Reino na Boneiro, Sint Eustatius y Saba.
A tene un combersacion profundo cu e miembronan di Colegio Ehecutivo. Cft a expresa un bes mas su preocupacion pa e calidad di e maneho financiero cu ta deteriorando fuertemente. Den e combersacion cu Colegio Ehecutivo Cft a indica cu, di conformidad cu e legislacion vigente, mester formalisa mas aleu e palabracionnan respecto e plan di mehoramento di e maneho financiero. Mester formula e plan di mehoramento di e maneho financiero actual mas cla y complement’e pa medio di un aplicacion adecuado di e recomendacionnan di accountant den e cuenta anual di 2017. Den caso cu Cft no mira suficiente progreso al respecto y den aplicacion di e plan adapta, anto ta inevitabel cu lo bin un escalacion den forma di un conseho na Secretario di Estado di Asunto Interno y Relacion den Reino pa procede na duna un instruccion. Cft a spierta Colegio Ehecutivo pa preveni esey.
Tambe a debati tocante e preocupacionnan pa loke ta e ciclo presupuestario y di hustificacion. Asina, por ehempel, ainda no a entrega na Cft e presupuesto di 2019 ni e cuenta anual di 2017, pa cualnan Colegio Ehecutivo a pidi un aplasamento te final di september. Por lo tanto, Boneiro no ta cumpli cu e fechanan limite cu ta stipula den e Ley tocante finansa di e entidadnan publico Boneiro, Sint Eustatius y Saba (Ley FinBES).
E bishita aki tabata tambe e prome bishita di H.G.J. (Henk) Kamp, cu a tuma e funcion over for di S.M. (Sybilla) Dekker como miembro di Cft entrante dia 1 di juli riba recomendacion di Hulanda. For di dia 1 di juli 2018 Cft BES ta consisti di Presidente Raymond Gradus, miembro postula pa BES Herbert Domacassé y miembro postula pa Hulanda Henk Kamp.
