Ta parce cu Gabinete Wever-Croes II no ta tolera opinion contrario na esun di nan y no tin piedad pa tuma medida contra esun cu tribi di expresa su mes publicamente. Ayera diaranson, Eric Ras, un empleado publico di mas cu 15 aña di servicio na Dienst Openbare Werken (DOW) a expresa su mes riba Facebook relaciona cu e prijs di combustibel. Awe caba el a haya un carta na su cas, den cual a suspend’e pa seis siman, pa un investigacion.
Mester menciona si, cu e palabranan cu Eric Ras a scoge pa expresa su mes, tabata hopi ofensivo y di insulto contra e prome mandatario di nos pais. Riba dje, siendo trahado di DOW, e mester a considera tambe cu minister-president ta su hefe direct, como e minister encarga cu maneho di infrastructura di nos pais. Pa bay manda un insulto riba red social, no ta consehabel ni tolerabel den un pais di norma.
Awe Eric Ras a haya un prohibicion pa drenta tur edificio di DOW durante un periodo di seis siman, asina e carta cu nan a entreg’e ta indica. Mas leu a skirbi den e carta di suspension cu si acaso e investigacion disciplinario no keda cla den e tempo stipula, cu lo por alarga e suspension cu seis siman mas, pa yega na un total di tres luna di tempo. Den e termino ey gobierno lo mester tuma un decision riba e investigacion, cu den e caso aki ta insulto contra minister-president.
Eric Ras ta traha pa mas cu 15 aña caba na DOW como un empleado publico, den e seccion unda ta saca copia di mapa pa tereno, cas, edificio y proyectonan industrial. Riba su Facebook a tuma nota cu e no tin ningun preferencia politico of por lo menos no sa publica nada di ningun partido. Hende cu conoce ta kere cu presion social y su mesun problemanan na cas a pone explota ora el a tuma nota di adaptacion di prijs di combustibel. De facto, gasolin a hasta baha e luna aki, aunke ta cu dos cen, pero por lo menos no tabatin aumento, manera si tin riba prijs di diesel y kerosin. Esaki lo a pone su fuse bula y a opta pa los un comentario pisa y a dirigie contra minister-president.
Di otro banda, coordinadornan di Gabinete Wever-Croes ta pasa henter dia riba Facebook ta insulta tur cu por tin un opinion diferente na esun di e gobierno na mando. Claro cu esey no ta yuda den e proceso. Y mesun estricto cu ministernan ta contra tur ambtenaar cu ta expresa nan mes, uzando palabranan robes, pa persigui nan y castiga nan, mesun maneho mester tin contra esunnan yega na gobierno tambe.
Por ehempel, Annie Maduro, cu ta traha pa Cuerpo Especial Arubano den Cocolishi y cu a insulta e periodista Andreina Morillo, cu a keha gobierno na gobernador. E periodista a informa mininster-president di e menasanan cu e ambtenaar a expresa contra dje publicamente riba red social, pero te awe e ta na trabou manera nad’un pasa. Esey tampoco no ta aceptabel, pasobra mas e coordinadornan sigui instiga e pueblo aki ‘fo, mas di e tipo di casonan asina lo bin. Aunke cu, manera nos a bisa mas ariba, no ta aceptabel ni tolerabel!
