Cerbes Balashi na comienso di aña 2018 a introduci e logo nobo di cerbes Chill y for di eynan a cuminsa un campaña. Un campaña pa recompensa bo mes na momento cu bo trece e boternan aki bek na Balashi.
Cada boter cu trece bek tin un balor di 20 cent, cada caha bo trece bek tin un balor di fl.4,80. E campaña aki na su inicio di duna oportunidad pa trece bek e boternan cu e logo anterior, a duna un espacio di 6 luna pa esaki, pero lamentablemente esaki lo ta e ultimonan. Rowald Werleman Beer Ambassador di Cerbes Balashi ta conta cu esnan cu tin boter ainda warda na cas tin chens te cu dia prome di augustus proximo.
Despues di e fecha aki no ta acepta boter cu logo bieu mas pero lo pasa p’asina tuma boter di cerbes Chill cu logo nobo unicamente. Ta remarca tambe cu cerbes Chill riba su mes ta sumamente exitoso cu tur campaña cu nan tin, e Logo / Look nobo cu a lansa ta uno cu a haya un tremendo acogida, y pa esaki nan ta hopi agradecido na e pueblo pa aceptacion. Cerbes Chill ta un brand cu cada biaha ta keda crece mas y mas y sigur ta hopi agradecido na esaki. 
E anuncio di e cambio no a bin ayera, ta algo cu a mira na prome luga e produccion riba mercado cu tabata den circulacion y asina ey a duna espacio pa custumbra cu e Logo nobo, na principio a papia di seis pa nuebe luna, pero a resulta di a bira 1 aña y 6 luna despues y cu a bira tempo y cu a duna suficiente espacio. Den sistema ta registra cu tin algun di e boternan aki ainda den circulacion y ta p’esey e yamada aki y e recordatorio na e cliente cu tin boter cu logo anterior ainda pa trece esakinan prome cu e fecha stipula.
