Manera ta conoci, Centro pa Hoben y Famia (CHF) a habri su porta 10 di juli ultimo, cu e meta pa cuminsa brinda comunidad di Aruba su diferente servicionan.
Centro pa Hoben y Famia ta un di e proyectonan di Social Crisis Plan, unda a nota cu mester di un centro specifico cu por ofrece servicionan multidisciplinario na nos comunidad.
Den e Centro pa Hoben y Famia diferente organisacion a uni pa ofrece nan servicionan bou di un solo dak. E organisacionnan aki ta actualmente: Directie Sociale Zaken, Tienda di Educacion, Fundacion Pa Nos Muchanan, Fundacion Respetami, Wit Gele Kruis y Fundacion Anti Droga Aruba y Centro di Adiccion Aruba.
Organisacionnan cu Centro pa Hoben y Famia ta trahando hopi di cerca cu nan pa cu proyectonan ta: Telefon Pa Hubentud, Famia Plania, Heart Centered Leadership Foundation y tambe Adventist Development and Relief Agency.
Centro pa Hoben y Famia a organisa diferente actividad desde cu a habri su portanan. Centro pa Hoben y Famia a organisa 2 zomerkamp pa hobennan di 10-13 aña unda a ofrece 20 hoben cu ta bay diferente charlanan educativo pa prepara nan pa cuminsa scol secundario. En conexion cu COVID-19 Centro pa Hoben y Famia a organisa un total di 2 zomerkamp den e luna di juli y augustus unda un total di 25 mucha y hoben a participa. E campamentonan aki a bay den colaboracion cu diferente instancia cu a colabora, manera Fundacion Respetami, Fundacion Famia Plania, FADA, Wit Gele Kruis.
Den luna di September e Centro a organisa un charla pa muchanan conhuntamente cu Telefon pa Hubentud tokante “E efectonan di COVID-19” y conhuntamente cu FADA a organisa pa mayornan e charla interesante tocante “Gaming y su efectonan pa mucha”.
Durante luna di september y october conhuntamente cu Stichting Wit Gele Kruis a cuminsa 2 curso tras di otro pa “futuro mayornan hoben”unda a ofrece mayornan hoben diferente charla pa prepara nan pa bira mayor.
Den e luna di october tambe a cuminsa un trayecto di “Educacion pa mamanan hoben” hunto cu sosten di stichting ADRA (Adventist Development and Relief Agency). E curso aki ta enfoca ariba e desaroyo personal di e mamanan hoben aki y ta ofrece nan cursonan pa por subi e mercado laboral despues.
Den vakantie di october ultimo a organisa diferente workshops educativo pa hobennan entre 10 pa 13 aña unda a enfoca ariba e topiconan importante manera: Adiccion y su consecuencianan, Videogaming y su efectonan, Norma y balor, Desaroyo di curpa, Sexting y internet safety y bullying, Malesanan transmiti sexualmente y Higiena.
Den lunanan venidero Centro pa Hoben y Famia lo tin mas actividad pa nos comunidad. Por comunica cu e Centro pa Hoben y Famia via nan plataforma di Facebook of yama na 528-1200.
