Adult & Teen Challenge Aruba tin su oficina situa den Neptunestraat y ey ta caminda esnan cu mester di ayudo pa nan mes of un familiar cu ta den adiccion.
E Centro di Hende Muhe, cu e fundacion ta trahando riba dje pa yuda hende muhenan cu adiccion, lo bay ta establece na e mesun sitio unda nan oficina ta actualmente (pega cu EPI). Pa cuminsa, e intencion ta pa ricibi 6 hende muhe cu di berdad kier un cambio den nan bida.
Pero no mester lubida, e presidente Yvonne Simon Andrade a splica, bo no ta bay ta atendiendo solamente e 6 hende muhenan aki. E organisacion ta bay ta envolvi cu e famia y hendenan cu ta rond di e 6 clientenan aki. “Pues e ta hopi mas cu seis persona. Eynan nos ta cuminsa y lo expande. Na Oklahoma mes nan tin un centro cu 50 hende cu un edificio grandisimo, y facilidadnan completo. Pero nan tambe a cuminsa chikito y awor tur e experticio cu nan tin, nan ta pas’e over pa nos awo pa nos yega te unda e necesidad ta. Nos sa cu e demanda ta hopi grandi.”
Simon ta kere cu na final, e Centro lo brinda ayudo no solamente na esnan di Aruba, pero tambe tin hende interesa di Boneiro, Corsou y Caribe, cu ta interesa pa manda hende aki y haya e ayudo necesario. “No por cera porta pa ningun hende. Nos no ta pone limite na nos ayudo, solamente cu pa cuminsa e ta 6 hende muhe.”
E programa ta cuminsa cu e parti basico cu tin un aña di duracion. Ta traha pa hiba e grupo aki dilanti, dunando nan e hermentnan necesario pa haci e cambio den nan bida. Ora cu nan finalisa e programa, ta encurasha e participantenan pa keda y yuda e siguiente grupo cu ta drenta. Pero nan lo ta yudando den forma di stagiaire, cu ta parti di e sistema (programa).
Si nan ta dispuesto, nan lo bay participa den e siguiente trainingnan cu ta dirigi riba liderazgo y na final nan lo yuda guia e programa. Nan sa miho cu cualkier otro con por yuda e otro personanan nobo cu ta drenta buscando un ayudo, sra. Simon a bisa. “Nan lo por conecta hopi bon cu esnan cu ta studiantenan nobo pa yuda nan hiba un bida nobo den e proceso aki.”
E gasto basico di participante ta 1200 florin pa luna, cu ta encera nan estadia, nan alimento y e guia necesario. Pa esnan cu nan of famia no por haci e pago aki, ta busca un forma pa haya e ayudo financiero necesario pa no mester cera porta pa ningun hende. P’esey ta hopi importante pa famia tambe ta envolvi, hasta si no por cu e finansa necesario, pero yudando den cierto trabounan.
