Centro di Bario Playa Pabao ta celebra Dia di Betico cu paseo di bicicleta

Directiva di Centro di Bario ta anuncia su prome actividad pa aña 2023. Ta trata aki di un paseo riba bicicleta cu lo tuma luga diaranson 25 di januari dia cu nos ta celebra Dia di Betico.

E actividad aki ta den cuadra tambe di e actividad anual di “Tin Union Familiar” (TUF). E actividad aki ta enfoca y stimula e importancia di tin un union den famia. Den pasado a organisa TUF cu exito na unda e famianan ta uni y participa na e actividad aki. E aña aki atrobe a dicidi pa organisa un paseo riba bicicleta na unda e famianan por uni ya cu e mayornan por participa hunto cu nan yiu(nan) riba bicicleta. Tambe e bisiña-, colega-, club- deportivo, scol- y barionan por forma nan grupo.

Manera ya menciona e actividad aki ta tuma luga Dia di Betico. Pa 9:00 am ta sali rumbo pa Arashi, pasando via Bubali y San Minguel. Lo regresa Centro via e caminda grandi di Noord. Lo tin musica pa compaña e grupo. Inscripcion ta tuma luga na Centro di Bario Playa Pabao di dialuna pa diabierna di 8:00 am pa 12:00 pm y di 2:00 pm pa 6:00 pm y tambe lo tin oportunidad pa inscribi dia di e actividad prome cu 8:30am.

E prome 150 persona cu inscribi lo ricibi un T-shirt. Lo cobra e suma di dies florin, cual ta inclui awa y fruta. Pagando e suma di 25 florin bo por huur un bicicleta pa e actividad aki. Nos grandi- y chikitinnan tambe por participa ya cu tin un bus disponibel. Inscribi na tempo, pasobra e cuponan ta limita.