Celebrashon di entrega di diploma y certificado na Praktijk Ondersteuners huisartsenzorg

918

Ariba 28 di maart 2018 a hasi entrega di diploma na e di 2 grupo di POH nan cu a caba cu e module nan di Diabetes y CVRM (Cardiovasculair Risico Management ) di e opleiding di POH.

Na september 2016 a start cu e promer grupo pa cu e opleiding di POH, e opleiding aki tabata tin un durashon di 3 luna, aki 13 POH a slaag  den e module di diabetes. E opleiding pa e di 2 grupo a start na maart 2018, 8 cursista a participa na esaki y tabata tin un durashon di 6 luna y den e ultimo etapa a incorpora tambe e module di malesa nan cardiovascular (CVRM). Aki nan e promer grupo a join den e module di malesa nan cardiovascular y awor nos tin POH nan cu ta certifica den diabetes y CVRM.

Den e opleiding e cursista nan mester a hasi varios tarea cu tabata basta intensivo den diferente area, en total nan a elobora ariba 6 materia cu ta samenwerking, communicatie, professionaliseren, organiseren, vakinhoudelijk handelen & maatschappelijk handelen. Tur materia a wordo duna door di docente nan local y POH nan cu mas experiencia tur bow guia di docente nan di Breederode Hogeschool.

E celebrashon a tuma lugar na Surfside Marina, cual a cuminsa cu e parti official unda cu algun persona clave a duna un speech cortico pa felicita e POH nan cu nan logro, entre otro; sra. Jasmira Croes-Mora (POH-Coordinator), sr. Edwin Roos (bestuursvoorzitter di WGK), sr. Jeroen Dorsman (director Breederode Hogeschool), sr. Gino Goeloe (director WGK) y sra. Willie Kouwenhoven y sra. Irma van de Velden a hasi entrega di e diploma y certificado nan na e POH nan. Representante di Botica di Servicio sra. Stacey Greaux a hasi entrega di un bunita regalo na esnan cu a gradua. Tambe presente na e anochi aki tabata un delegashon di Curaҫao, WGK Curaҫao & GMN cu a bin pa presencia e graduashon y tambe pa estrecha e laso nan cu Aruba y Hulanda ariba e tereno di POH.

E graduado nan di e anochi aki tabata Malou van den Borne, Meralis Chirino, Carolyne Geerman, Ysatis Kelly, Frederika Rangel, Dora Tabares y Rowald Wever E anochi aki e graduado nan a presenta cu hopi orguyo e logo nobo y colorido di POH cu nan mes a diseña y nan a splika tambe kiko cada color y forma ta representa.

E anochi a sigui cu un recepshon ameno parti pafor unda steelband a deleita tur presente cu nan dushi musica.

Awor cu e module di CVRM a bin aserca ta hasi cu e trabow di e POH nan lo bai bira mas extenso pa cual motibo tambe cu lo mester bai aloca 1 POH pa cada dr. di cas si ta desea pa atende cu tur 2 tipo di patient nan dus esnan diabetico y patient nan cu malesa cardiovascular. Den e cuadro aki lo mester start cu un di 3 grupo di POH pa por logra e meta aki.