Awe riba dia internacional di nos Grandinan, Prome Minister mr. Evelyn Wever-Croes a pasa un rato ameno cu Grupo Flor di Aloe na Centro di Bario Tanki Leendert. “Pa Gabinete Wever-Croes nos grandinan tin prioridad. Nan a traha duro pa pone nos pais unda e ta y awo ta nos deber di brinda nan un bida husto y trankil. Ta un Honor pa pasa un rato cerca esnan cu a construi nos pais”, asina Prome Minister Evelyn Wever-Croes a bisa awe mainta.
Dia internacional di nos Grandinan ta un dia cu Nacionnan Uni ra celebra anualmente dia 1 di october. E ta pa reconoce e contribucion di nos grandinan y probecha pa duna un man na soluciona retonan cu por mehora nan calidad di bida.
World Health Organization (WHO) cu ta e autotidad di Nacionnan Uni pa dirigi y coordina asuntonan cu ta regarda salud publico, ta masha activo promoviendo mas conscientisacion riba Dia internacional di nos Grandinan.
E discusionnan ta concentra riba topiconan manera populacion di nos grandinan, cuido di salud adecuado pa nos grandinan, trabou boluntario, cuido social y formanan pa por inclui mas ciudadanonan di edad avansa den nos forsa laboral.
Tabata dia 14 di december 1990, durante un asamblea general di Nacionnan Uni, cu a vota pa celebra Dia internacional di nos Grandinan riba dia 1 di october. E dia aki a bin na vigor despues di e “Vienna International Plan of Action on Ageing” cu e asamblea mundial di Nacionnan Uni a adopta na aña 1982 caba. A observa e dia aki pa prome biaha na nivel mundial riba dia 1 di october 1991.
