Purple Day ta un evento internacional cu e meta pa concientisa e comunidad riba epilepsia cu ta wordo teni tur aña riba 26 di maart. E evento aki a wordo funda na 2008 na Nova Scotia, Canada door di Cassidy Megan di 9 aña cu sosten di e organisacion di epilepsia di Nova Scotia. Cu esaki Cassidy cu tawata sufri di epilepsia, kier a logra cu e persona cu tin epilepsia, no kere of sinti cu e ta su so pa asina y combersa cu otro y informa otro tocante epilepsia. Ta asina por elimina myto- y taboenan riba e malesa aki.
Na 2009 e organisacion di epilepsia di Nova Scotia y esun di New York na Merca a uni forsa y asina e Purple Day a bira internacional. A scohe pa e color biña, lavendel, bira e color internacional pa epilepsia y pesey ta pidi pa mas tanto posibel hendenan bisti na biña riba e fecha menciona.
Myones di hende na mundo ta sufri di epilepsia. Por bisa cu 1 riba cada 100 hende por haya un atake di epilepsia den nan bida y pesey ta hopi importante pa nos comunidad wordo concientisa riba e enfermedad aki. Na 2007 Stichting Epilepsie Aruba (SEA) a wordo lanta cu e meta aki, pasobra no tawata exsisti un organisacion unda e pacient y su famia por a haya informacion riba e tereno aki cu tur su consequencianan. Cu ayudo di entre otro dokter- y otro personanan activo riba epilepsia, nos fundacion riba un base regular ta tene charlanan riba e malesa aki. Tambe nos ta tene lectura pa e scolnan y organisacionnan social y cada biaha ta resulta cu nos comunidad tin necesidad grandi na informacion debido riba epilepsia. Y den e cuadro aki ya pa un par di aña SEA ta celebra Purple Day tur aña na un kleuterschool y e aña aki e celebracion lo tuma lugar na Kleuterschool Prome Paso Savaneta unda Directiva di e skol aki a prepara un bunita programa pa e chikitinnan cu lo haya un treat den forma di juice y un cup cake cu capa biña cu ta color di e evento anual aki.
Custumber ta cu e Minister di Enseñansa ta presente na e celebracion di Purple Day pero
aña aki lastimamente Minister Armando Lampe no por ta presente pero e lo wordo representa door di e Directrice di SKOA.
Corda cu un hende cu epilepsia por hiba un bida normal, basta e ta na haltura kiko ta epilepsia y e sigi instruction di su dokter. Ta hopi importante tambe pe tin sosten y ayudo continuo di su esnan cerca di dje.
