Diaranzon 5 di December Dia Internacional di Boluntario a wordo celebra mundialmente. Un dia cu ta pone atencion riba e trabao boluntario cu for di 1986 a ser proclama pa Nacionan Uni pa conmemora e fecha aki.
Un dia importante unda CEDE Aruba ta escohe pa anuncia nan celebracion anual di boluntario, cu ta e segundo celebracion di “Volunteer of the Year awards”
(VOTY). Sra Elsa Krosendijk coordinador di evento a splica di e importancia di e trabao di boluntario. “Na Aruba tin hopi instancia cu ta draai danki na trabou di boluntarionan cu ta dedica nan tempo sin exigi nada a cambio. Nan ta esnan cu ta facilita e trabao di un organicacion.” Unda cu falta di personal of professional aki ta unda e tarea di e boluntario yudansa ta bira importante.
Director di Cede Aruba sr Daniel Tacklenborg a splica mas con CEDE Aruba ta duna su sosten na tur organisacionan cu ta pidi yudansa na CEDE. Un dia di boluntarismo ta pa reconoce y gradici boluntarionan pero tambe ta desea pa nos ricibi mas boluntario pa yuda organisacionan cu mester di e yudansa aki.
Na inicio di 2018 a celebra e prome reconocimento unda mas 70 boluntario escohi den 2017 a ricibi nan award.
Diabierna 18 di Januari 2019 ta bira e fecha official unda cu e segundo actividad importante aki lo tuma lugar den New China Club.
Cu e celebracion aki Cede Aruba lo gradici tur boluntario cu a destaca pa nan organisacion durante 2018. Boluntarionan cu ta duna nan tempo valioso sin pidi ningun recompensa lo wordo honra y lo ricibi un Award traha for di materialnan recylca.
Sra Yolanda Smit – Richardson cu ta encabesa e Proyecto a splica con henter e Sistema ta hinca den otro y kico por haci pa asina bo nombra bo boluntario. Sra Smit –Richardson: “Tur non profit organisacion na Aruba cu ta traha cu boluntario, ta wordo pidi pa nombra un boluntario cu a traha den nan organisacion y cu a haci un impacto grandi riba e organisacion durante aña 2018.
E instancia, organisacion of fundacion cu kier nombra nan boluntario mester yena un formulario unda lo por constesta preguntanan, p.e.: e motibo pakico e organisacion kier nombra e boluntario aki.
E link pa e formulario ta riba e website di Community Guide www.org.aw. Click e boton Submit your Volunteer y yena e formulario. Por hasi esaki via computer of smartphone, unda por type “org.aw” den un browser.”
Tur organisacion cu no a registra nan mes riba Guia Comunitario ORG.aw ainda, por registra mesora: escohe e link “register organisation” y yena bo informacion. Asina e comunidad di Aruba por haña bo informacion mas facil y completo.
Ultimo dia pa inscribe bo Boluntario ta 18 di December 2018.
