Den un esfuerso di colaboracion dirigi na promove diversidad y inclusion den nos comunidad, Centro pa Desaroyo Aruba (CEDE Aruba), BARiO UNICO, den participacion cu Pan American Development Foundation (PADF), a lansa un serie comprensivo di 4 sesion di training. E sesionnan aki ta diseña pa ekipa organisacionnan no-gubernamental (NGO) y fundacionnan na Aruba cu conocemento y habilidad esencial riba diversidad y inclusion.
E serie di trainingnan a inicia diahuebs, 25 di april, cu un sesion interesante riba ‘Cultural Sensitivity’, poniendo e tono pa un comprension mas profundo di e dinamica di diversidad cultural. E di dos sesion, cu a tuma luga dia 20 di mei, a enfoca riba e posibel desafionan cu studiante migrantenan ta enfrenta ora di adapta na un pais nobo. Esaki tabata un tayer facilita pa VeneAruba, basa riba nan experencia di trabou cu studiante migrante den nan programa despues di scol.

E di tres sesion di training a cubri e tema di mecanismonan di proteccion pa migrantenan y refugiadonan. Esaki tabata un sesion informativo facilita pa UNHCR, cual a subraya e importancia di proteha e derechonan y bienestar di migrantenan y refugiadonan.
E serie a finalisa cu un sesion informativo riba Monitor y Evaluacion (M&E), cu a enfoca specificamente riba midi impacto social. Dahariana Evertsz a facilita e sesion aki, enfatisando e importancia di responsabilidad y practicanan basa riba evidencia den proyectonan social.
CEDE Aruba y BARiO UNICO ta extende nan gratitud sincero na tur facilitado- y partnernan cu a contribui na e exito di e iniciativa aki: Universidad di Aruba pa su compromiso na avansa educacion y inclusividad, y John F. Kennedy Education Centre Aruba pa su generosidad den hospeda e serie di trainingnan.




Pa medio di e sesionnan di trainingnan aki, BARiO UNICO a logra yega 31 diferente organisacion y 55 beneficiario. E organisacionnan aki, cada un cu diferente mision y grupo di enfoke, lo hunga un rol fundamental den distribui e conocemento entre varios sub-sectornan di e sector social riba e isla.
BARiO UNICO ta sigui sirbi como e team organisatorio pa e sesionnan di trainingnan aki, facilitando conexionnan entre organisacionnan riba e isla y facilitadonan cu experticio riba nan tereno, promoviendo un ambiente di desaroyo y colaboracion. Un di e metanan crucial di e proyecto aki ta pa fortalece e comunidad di nos isla, duna centronan di bario y otro organisacionnan e recurso y hermentnan necesario pa crea un impacto social positivo.
CEDE Aruba y BARiO UNICO ta comprometi pa sigui ofrece tayernan continuo riba diferente topiconan relevante pa NGO- y fundacionnan.