CEDE Aruba cu diferente iniciativa pa yuda recauda fondo

428

Happy to Give Back ta un programa di recauda fondo na e momento aki pa sostene famianan den necesidad durante crisis di Covid. Na april a cuminsa cu e programa aki y lo bay sigui te fin di september cu esaki. Na e momento aki e programa ta sostene tres iniciativa na Aruba.

E prome ta Fundacion pa Nos Comunidad cu 75% di tur e fondonan pa pakete di cuminda y tambe otro sosten cu e fundacion ta duna na famianan. Segun Daniel Tacklenborg, director di CEDE Aruba, durante un rueda di prensa, e di dos fundacion ta Ban Uni man pa cria nos muchanan cual ta 15%, cual ta desayuno pa muchanan durante scol. Aki djis scol ta habri bek y ta premira un aumento di e peticionnan.

Cede Aruba: Augustus lo bira e luna di Happy to Give Back

Posted by 24ora on Thursday, July 30, 2020

E di tres fundacion ta YMCA of Aruba, cual ta participa den e Meals on Wheels program hunto cu Cruz Cora y ta prepara 200 cuminda cayente pa dia pa hende cu no por cushina of no tin material pa cushina na cas.

Te cu awor aki a recauda fondo di 555 mil florin cu Happy to Give Back. Esaki ta companianan local ,companianan internacional, hende local, hendenan di afo cu a haci donacion pa medio di website y tambe pa medio di transfer riba nan cuenta di banco.

CEDE Aruba ta mira si cu tin un necesidad hopi grandi ainda den comunidad di Aruba. Diferente organisacion cu ta brinda ayudo a registra un total di 8 mil famia, cu a pidi pa sosten. Esaki ta 8 mil famia cu pa luna mester haya sosten.

E ta un necesidad enorme. E ta un problema hopi grandi y e fondonan cu na e momentonan aki ta disponibel via entre otro tambe gobierno di Hulanda, diferente donacion cu ta drentando for di e diferente instancianan no ta suficiente pa yuda tur e famianan aki. Pesey ta insisti cu ta importante pa sigui recauda fondo. Ta un momento dificil mirando cu e hendenan no ta den posicion pa yuda, y ta kere cu tin grupo y companianan cu ainda por duna un man.

Pesey, hunto cu diferente partner, a anuncia di Happy to Give Back Month. E idea ta pa den luna di augustus pa tin diferente iniciativa pa recauda fondo. E invitacion ta bay pa tur organisacion, hende pa den un of otro forma cu nan por, pa yuda.

Ta parti e luna den cuater siman, unda cu durante un siman ta haci un enfasis riba donacion via SMS. Esaki ta haci hunto cu SETAR.

Tambe ta bay colecta durante e luna aki riba caya cu cahanan di donacion. Lo haci colecta entre otro na stacionnan di gasolin. Ta bezig cu hopi diferente iniciativa creativo y na fin di augustus ta organisa un radio y telethon pa cera e luna unda cu tur hende, tur compania ainda por haci donacion.

Tin diferente partner den esaki, cual CEDE Aruba ta hopi contento cu nan. Entre otro ta trata di SETAR, Telearuba, un grupo grandi di stacion di radio. Tambe tin Paradera Gasoline Station. Tin diferente salon di beyesa y barberia, iniciativana di deporte, Vacation Rentals, Restaurant.

Con abo of bo compania por yuda den e luna aki

Tin diferente forma pa haci esaki. Entre otro por haci donacion online riba e website di happytogiveback.com of tambe via transfer riba cuenta di banco di Cede. E informacion ta riba e website di happytogiveback.com. Por join e team di e luna di Happy To Give Back cu algo special cu bo compania por ofrece. Por ehempel un lunch special, un Happy Hour special, bo por colecta via un donation box di bo compania of organisa otro tipo di evento cu por recauda pa Cede. Por cumpra tambe un of mas ora di transmision durante e radio/telethon na fin di augustus.

Tambe bo por haci un colecta entre empleadonan di bo compania. Pero tambe cosnan mas simpel, manera organisa un carwash, un bakesale of cualkier otro evento. Famia of hobennan cu kier haci algo tambe por yuda den esaki. Importante ta pa registra bo actividad pa e ta algo oficial cu ta colecta pa Happy To Give Back. Pa mas informacion of pa participacion como un colectant, por acerca Cede Aruba via email na [email protected], pero tambe Natalie Rietman na 6305451 of Elton Arends na 5939933.