Despues cu pa lunanan largo a keha di e falta di iluminacion den cayanan di San Nicolas, parce cu porfin DOW a activa y a yega na un solucion satisfactorio. Ayera nochi, esunnan cu a pasa den caya grandi na San Nicolas a nota cu porfin a cende luznan LED den caya.
Te ainda a cende e luznan solamente na inicio di caya grandi, faltando e resto di caya pa tambe por conta cu e iluminacion necesario. Habitantenan ta lamenta cu a dura asina largo prome cu por a soluciona e reto, pasobra e area ey ta unda pashentnan ta bay botica pa busca remedi anochi of na otro banda di caminda ta bay pa lanta placa na e mashin di ATM di banconan.
Den cierto forma, San Nicolas ta sinti cu constantemente, den forma delibera, ta lubida riba nan prioridadnan. Si luznan kima den caya grandi na Playa, mesora ta haci tur lo posibel pa drech’e. Na San Nicolas e ta dura lunanan, hasta for di tempo di Minister Otmar Oduber ya caba a cuminsa reclama e falta di iluminacion. A culpa awasero y delaster un otro motibo dicon e luznan no ta funciona optimalmente. A nota si un cambio awor bou maneho di Minister Marisol Lopez, cu ta poniendo accion mesora tras di e proyectonan di San Nicolas cu a keda pega of warda den lachi.
