Apesar di e situacion di COVID-19 Gobierno a dicidi di tene un ceremonia pa inaugura e luznan den caya grandi na Playa.
E prome mandatario a dirigi su mes na publico y a bisa cu apesar cu tabata un aña hopi dificil y di hopi reto, door di COVID, ta bon pa para un rato keto y aprecia tur e cosnan bon cu tin den bida. “Ohala e iluminacion y e decoracion bunita por yena tur hende cu speransa, paz y inspira un y tur.”
El a gradici e team di DOW cu a haci e trabou di decoracion y iluminacion. Na mesun momento a pidi pa corda riba e comerciantenan local ora di haci compranan di fin di aña. A anuncia tambe cu e caminda principal ta habri pa trafico despues di 6’or di atardi y cu e ta evaluando pa habri esaki pa algun ora mas pa trafico, ora cu e tram no ta move.
Minister Armando Lampe tambe presente a bisa cu e cendemento di luz ta algo simbolico ya cu aña 2020 tabata uno hopi dificil cu a trece scuridad den hopi cas. P’esey e ta bisa cu e ta simbolico cu gobierno ta bisa pa cende luz. “Ban manda un tiki luz memey di tur e scuridad,” Lampe a bisa. El a mustra cu e homber santo cu tin den decoracion ta ilustra bondad y cu e ta sigura cu bondad lo gana di maldad.
Segun director di DOW Marlon Croes, e areanan cu a decora ta encera Plaza Daniel Leo, Caya Grandi na Playa y San Nicolas, Santa Cruz, Palm Beach, Linear Park y Lagoen. “Apesar cu ta den e crisis di COVID, semper kier percura pa contribui den e temporada aki, pa trece iluminacion, fe y speransa pa nos recupera pronto y pa Aruba habri un 2021 den miho forma. Gerencia di DOW ta gradici e ekipo di contratista cu a traha riba e proyecto den tempo corto,” sr. Croes a expresa.
