E apelacion cu Prensa a haci na Corte no a yuda pa nada. Corte na momento di dicidi den e caso di Norman Serphos a duna un castigo mas pisa di loke Ministerio Publico a pidi.
Corte di Prome Instancia na Corsou dialuna mainta a impone un castigo di trabou incondicional di 40 ora riba e sospechoso aki. Si e castigo aki no wordo ehecuta di e debido forma, e lo mester sinta 20 dia den prizon. Ministerio Publico den e sesion di dia prome di april ultimo a pidi un castigo di trabou condicional di 60 ora, y si e no cumpli cun’e 30 dia di prizon cu un tempo di prueba di dos aña.
Hues a haya legal y convincentemente proba cu Serphos, kende te na momento di a comete e delito tabata bosero di Ministerio Publico, dia 20 di december, 2018 a haci un denuncia falso door di conscientemente entrega un keho na Polis cu su Facebook a wordo gehack siendo cu e tabata sa cu esaki no tabata e caso. E defensa di su Abogado cu el a actua den “noodtoestand” no a wordo acepta. Huez a haya cu no a keda proba cu Serphos, basa riba e menasanan di morto cu el a ricibi despues cu el a pone un comentario riba Facebook, a haya su mes obliga pa actua en pugna di berdad entregando un keho cu su Facebook a wordo gehack. For di e dossier ta resulta cu S., riba insistencia di Procurador General y Fiscal Mayor di Husticia a haci denuncia, y esaki despues cu inicialmente e mes no tabata kier a entrega keho.
Entrega di un denuncia falso ta algo castigabel ya cu door di esey ta existi e peligro cu Polis y Husticia ta wordo engaña. Serphos a haci su mes culpabel na esaki, y pa colmo na momento cu e tabata trahando cu Ministerio Publico. Hues ta tum’e hopi na malo pa esaki. Hues a bisa tambe cu e persecucion di Serphos no por papia di “schieten mete en kanon op een mug” (manera e dicho Hulandes ta bisa), manera cu su Abogado a trece dilanti.
“Basa riba tur e ariba menciona, no por papia di un perdon di parti di Corte y tin motibo pa impone un castigo di trabou basta largo,” segun Hues.
Teniendo cuenta cu tur e circumstancianan, e Hues na final a yega na e conclusion cu e seriedad di e delito proba su seriedad no ta wordo sinti cu e demanda haci door di Ministerio Publico, pa cual a condena e acusado na un “taakstraf” den forma di trabou pa comunidad di 40 ora, subsidiariamente 20 dia cera.
