Antonieta del Carmen Morales Soto por haya un castigo di un aña y mey den prizon. Esaki si Corte bay di acuerdo cu loke Ministerio Publico a pidi awe. A hib’e dilanti hues awe door cu el a practica e profesion di dentista na Aruba sin permiso di e Departamento di Inspeccion di Departamento di Salubridad Publico.
E acusacionnan contra dje ta cu el a practica trabou di dentista den forma “onbevoegd”, a uza e titulo di dentista y/of orthodontista den e periodo di 29 di maart 2019 te 6 di november 2020, door di lanta un praktijk y pretende di ta dentista y/of ortodontista y/of eherce riba tereno di salud publico.
Ta acus’e di, den e periodo di 29 di maart 2019 te 6 di november 2020, intencionalmente a keda sin brinda cuido segun standard profesional, door di (entre otro) trata pashent sin cu e ta autorisa, trata pashent den un ambiente no-profesional, insigur y anti higienico, trata pashent sin cu e tabatin remedi na su disposicion pa evita infeccion, duna pashent anestesia sin cu e tabata autorisa pa haci tal, traha sin e instrumentario necesario pa desinfecta y sterilisa aparatonan segun regla, traha den scondi door di cual no tabatin ningun bista ni control riba loke e tabata haci, trata pashent sin ta na altura di nan background medico door cu e no tin contacto cu dokternan di cas/laboratorio, keda sin hiba un administracion di su pashent, tratamento y remedi, keda sin informa Inspeccion/Departamento di Salubridad di su trabao.
Ta acus’e di, den e periodo di 29 di maart 2019 te 6 di november 2020, a prepara/bende/importa/entrega y/of almacena remedi sin cu e tabata autorisa pa haci tal.
Dia 27 di januari tin sentencia den e caso aki. Pa un relato mas amplio, lesa e siguiente edicion di TREMPAN.
