Awe mainta Corte di Prome Instancia a trata e caso penal contra dos Polis, esta Gilbert Yarzagaray y Angelo Webb. Ta acusa ambos di maltrato pisa durante nan trabou, despues di parada di carnaval den luna di februari aña pasa. Ambos Polis desde prome momento a admiti di a dal e homber cu mokete den su cara. Como hustificacion nan a bisa Hues cu nan tabatin varios dia trahando 16 ora pa dia y tabata hopi cansa.
Por lo menos un di e Polisnan a admiti den Corte dilanti Hues di a dal e homber un biaha so cu un mokete y djey a move e homber su cabes dos biaha cu su pianan. “Mi no por scop,” e Polis Yaragaray a bisa Hues. El a splica cu e tabata hunga futbol y a destrui su kruisband y a opera aña pasa. E otro acusado, Polis Webb a admiti cu el a dal e homber dos mokete, “e tabata un reaccion cu mi no sa pakico mi a hacie”. El a haci esey ora cu e homber tabata tira nan cu scop. E ta nenga di a scop e homber pero si a haci movecion cu su pia pa desvia un scop cu e detenido a manda riba nan.
Pero declaracion di casa di e detenido, di e yiu di criansa, di bisiñanan y hasta di coleganan Polis ta menciona y ta confirma cu tabatin maltrato. Tin Polis hasta a bisa di ta arepenti di no a interveni y mayoria ta apunta riba Gilbert Yarzagaray, kende a parti mokete y scop pa loco. Hasta un Polis a declara cu Yarzagaray a bisti handschoen y despues a tira mokete. Tin ta bisa di a tende e zonido di e sla pero no a mira kende a dal e homber, pero cu Yarzagaray tabata esun para mas cerca.
Hecho ta cu na final e homber, pa kende asistencia a wordo pidi pasobra e tabata burachi, agresivo y tabata menasa su casa, a keda cu un cara hincha, fractura na cashi di wowo, nanishi fractura, un ribchi kibra, 4 djente kibra y hasta a bay for di tino despues di a ricibi un sla masha duro. “Awe, mi por bisa cu mi mester a actua di otro forma. Pero e dia ey e situacion tabata parce di ta dura un eternidad. Nos tabata cansa, e homber tabata haci fastioso y no kier a para keto. Pero sigur mi intencion no tabata pa maltrat’e”, asina Polis Gilbert Yarzagaray a bisa dilanti Hues. Polis Angelo Webb di su banda, ya caba tabatin un caso di agresion den pasado pero net e tabata den opleiding y a pasa den un curso di maneho di agresividad, mescos cu awor nan mester a pasa aden atrobe.
E homber (victima) no a presenta den Corte pero si su casa y el a bisa cu nan lo cuminsa un caso civil pa daño y perhuicio contra ambos Polis.
Fiscal a bisa den su demanda cu nada no por hustifica locual a sosode. Un detenido na boei y cu 4 Polis na e sitio no mester a wordo maltrata di e forma aki cu el a ricibi varios fractura. Pa e motibo aki tambe, el a pidi un castigo di 15 luna di prizon di cual 3 luna ta condicional y 2 aña di prueba pa ambos Polis, cu awor ta sospechoso di husticia.
Hues lo dicta sentencia aki tres siman.
