Dia 21 di september, 2018 tabata e di dos biaha cu e hoben R.C. a ricibi un atentado contra su bida. E prome biaha a dal’e cu auto y na september 2018 a los 3 pa 4 tiro den su direccion di cual dos a alcans’e. Esnan responsabel pa e hecho aki cu ta dos hoben, di 20 y 23 aña, kendenan por pasa ocho aña den KIA si Corte honra e demanda di Ministerio Publico. Tur esaki ta debi, segun informacion cu a bini dilanti durante tratamento di e caso, na asuntonan di negoshi di droga.
Chendrik Maduro y Luis David Florez Mejia ta nenga rotundamente di conoce e victima den e caso aki, kende ta esun cu a indificanan. Pero tambe tin por ehempel, un pechi cu Polis a haya unda e fugitivonan a laga un scooter tira atras. DNA haci a resulta di ta di Maduro y e doño di e scooter a bisa cu el a presta Maduro su scooter e anochi ey.
Maduro mes a bruha su caso. Por ehempel, e ta bisa cu e no ta bende droga, y e droga haya na su cas ta pa propio uzo. Algun minuut despues, ta papia cu e ta bende mas droga cu RC, y p’esey e victima lo ta jaloers riba dje y a inventa e storia cu el a tira riba dje.
Hues a cuminsa pa repasa e PV di loke a pasa dia 21 di september na Shiribana, unda e hoben Carrasquero a haya dos tiro den lomba. E victima a declara e duo a yega na un cas unda cu e tabata di bishita cerca un amigo. E dosnan no tabatin helm bisti y claramente el a scucha Maduro pidi e otro e arma y el a dicidi di core. Despues e no sa di nada mas pasobra el a haya dos tiro y a cay na suela.
Polisnan mes tambe a reconoce e dos sospechosonan aki ora cu nan a laga scooter atras pa huy den mondi. Den e huida, Maduro a laga un pechi atras, cu a haya riba un dak, unda a mir’e pasa bay. Pero den Corte el a presenta cu un otro pechi y a bisa cu esun cu Polisnan tin no ta di dje. “Esaki ta e pechi cu mi tabatin bisti e dia ey y cu por mira tambe riba filmacion di e Chines unda cu mi tabata.” Pero tanto fiscal como hues a bisa cu e test haci ta mustra cu DNA di dje a haya den e pechi confisca.
Maduro, kende a presenta bisti cu un jeans cu tabata cay completamente y solamente tabata mira su jockey, cu su cara trankil a nenga cu e tin celular. Autoridadnan a graba su combersacionnan y e bos a wordo reconoci di biaha door di Polisnan. Den un di e combersacionnan el a lansa e menasa cu lo bay tira Carrasquero y cu pa esaki e ta bay presta e scooter di un amigo pa nan mobilisa mas facil. Tambe a scucha un otro combersacion unda cu e ta conta con el a huy di e sitio y unda el a bay sconde. Supuestamente pa tira dos hende y huy.
E victima a wordo opera e mesun anochi y algun dia despues y a keda casi un luna den hospital. E tironan a afecta su pulmon y higra. Dia cu e caso a bini pa prome biaha dilanti, el a bisa Corte cu e ta haci un demanda di 25 mil florin pa dañonan sufri. E biaha’ki cu e tratamento mes, e no a presenta y e motibo no ta conoci.
Maduro di su banda a keda persisti cu tur e cos aki tabata un set-up di Polis, pero pa ki motibo no ta conoci. Tambe el a bisa cu e cos aki ta debi na jaloezi tambe pasobra e tabata bende hopi mas droga cu Carrasquero y e ultimo aki tabata kier a podera di su punto unda cu e ta bende cu e chollernan.
Fiscal den su demanda a tene cuenta cu e circunstancia rond di e sucedido, con e victima a keda afecta pa e sucedido y e pruebanan cu tin acumula. Pa esaki el a pidi un castigo di 8 aña incondicional.
Aki dos siman tin sentencia.
