Un di e casonan cu a hala atencion na Aruba den tur e problema entre frontera di Aruba y Venezuela ta e hecho cu un ex Polis, kende a pasa pa Abogado y malversando miles di florin di Venezolanonan cu ta busca asilo politico.
Ta trata aki di Rudolf Gibbs, kende den pasado a haya su mes envolvi cu husticia pero a bolbe cay. Dia 15 di november tin sentencia den e caso aki.
Ta hopi hende e homber Gibbs a dal cara’bou gañando no solamente cu e ta Abogado, pero tambe cu e mes ta entrega peticionnan di asilo na DIMAS, cual e no tabata haci.
Dado momento e cantidad di casonan a bira asina hopi y e denuncianan a cuminsa drenta. Mesora a sospecha di kende ta papiando, ya cu no ta prome biaha cu e ta haya su mes envolvi cu husticia pa e motibo aki.
Ministerio Publico a haya suficiente informacion pa detene riba sospecho di malversacion y esaki ta e caso cu a presenta contra dje den Corte. E acusacion ta core di e periodo di september, 2018 pa 28 di maart, 2019, fecha riba cual a detene.
Cerca e Venezolanonan, cu tabata desespera y en busca di un forma pa keda Aruba, e tabata haci comosifuera e ta Abogado, pero e unico trabou cu el a yega di traha tabata Polis. Pero dilanti mesa berde, el a splica Hues cu e tabata brinda conseho huridico y pa e conseho aki e tabata cobra e hendenan. Pero den e declaracionnan haci contra dje, ta para claramente cu el a presenta su mes como Abogado. E prome persona cu a acudo na Gibbs, a bini cu cinco otro Venezolano. E splicacion cu nan a haya di Gibbs ta cu e procedura ta dura 12 siman y despues por apela. E seis personanan aki a paga en total nuebe mil florin. Pues cada un 1500 florin pa e carta cu Gibbs a traha di peticion di asilo cu nunca a yega DIMAS.
Hues a mustra riba declaracion di un persona cu tabata ilegal na Aruba na 2015 y a wordo saca y a bin bek y kier pidi asilo. El a conoce R.G. como e persona cu a bisa cu e ta abogado y lo por traha carta cu nan no por wordo saca. E persona tabata cu otro cinco. El a bisa cu R.G. a bisa nan cu e procedura lo dura 12 siman y asina mes por reacciona contra e conseho di Dimas pa Gobierno of por cuminsa un caso pa haya un conseho si ta tarda mas cu 12 siman. E persona a bisa cu nan, 6 persona, mester a paga 1500 florin cada un pa e carta.
Tin un diferencia di opinion den Corte ya cu Fiscal a bisa cu nunca Gibbs a entrega peticion di asilo of un carta na DIMAS of otro caminda. Pero e acusado ta bisa cu si el a traha carta y a entrega nan y a informa e hendenan cu mientras ta tratando e peticion, no por saca nan di Aruba. Inclusive, segun e acusado, a yama e hendenan pa entrevista.
Tambe a bini dilanti cu tin documento entrega, pero no tin suficiente informacion yena.
Fiscal a mustra cu e homber aki den pasado a haya su mes envolvi cu husticia caba y a haya un castigo di 30 luna di cual 12 luna tabata condicional, pa malversacion, falsificacion di carta y firma. Y awo ta algo similar. A tum’e na malo cu e tabata cobra demasiado placa pa un simpel carta, cu el a laga nan kere cu e ta Abogado (a pone un toga den su oficina). Mirando su record, y e hecho cu e tabata saca probecho financiero di esaki, Fiscal a pidi 12 luna di cual 4 luna ta condicional, 3 aña di prueba. Pero tambe a pidi pa ehecuta e 12 lunanan cu e tin pendiente, pasobra el a comete e delito aki den su tempo di prueba.
