Dr. Louise Rafael-Croes ta un pediatra conoci na Aruba y e ta conta riba cancer presente cerca muchanan. Cancer ta tur caminda na mundo. Esey ta nifica cu aki na Aruba naturalmente ta haya cancer di mucha.
Como cu e tratamento di cancer ta un tratamento largo, y no tin un specialista di cancer di mucha na Aruba. Tur cancer ta bay cerca e pedriatanan, ta diagnostica nan y ta mandanan cu transporte medico pa Hulanda. Tin algun caso cu ta excepcion, pero mayoria ta bay Hulanda.
Dr. Rafael-Croes a splica cu e casonan ta entre 3 cu 4 pa aña. Tin algun aña cu tin mas caso, por ehempel 5 of 6. Tin añanan cu tin menos, 2 of 3. Average ta cu e ta mas of menos 4 caso di cancer na Aruba.
Mayoria di nan ta haya un tratamento na Hulanda, depende e cancer cu nan tin y ta bay den un centro academico y ta haya nan tratamento eynan.
E tratamento ta varia entre 6 luna, un aña y dos aña, dependiendo di e grado di tratamento, of si nan mester haya chimoterapia of radioterapia of mester haya combinacion of un operacion.
Tin diferente tipo di cancer. Segun dr. Rafael-Croes, esun cu miho pronostico ta leycemia limfatico agudo. Esey ta un tipo di cancer di sanger. E ta compromete tur organo, cu excepcion e sanger, e ta compromete e organonan limfatico manera e higra, e bofi. Eseynan ta cancernan cu tin miho pronostico. Den mucha, e chens di sobrevivencia ta practicamente 99.5%.
Tin mucha cu ta wordo diagnostica hopi jong, manera di 1 aña y 3 luna. Tin algun di nan 6 y tin algun di nan 8 aña. Tin e spectrum di edad entre 0 y 14 aña. Tin di bisa si cu no tur caso di cancer ta na Hulanda.
Tin un caso di cancer na Aruba mes, cu ta wordo trata na e momentonan aki. E tratamento ta hands off. E ta e unico mucha cu cancer cu sa cu awor aki ta na Aruba y e ta bayendo hopi bon, segun dr. Rafael-Croes.
Cancer no ta un malesa cu bo por evita lastimamente, amenos cu bo tin un bola di cristal pa pronostik’e. Loke si ta hopi importante ta pa come saludabel, pa ta saludabel. Dios Gracia cu tin mayor cu ta hopi atento, pasobra si tin cierto cosnan cu e muchanan ta haci diferente, eseynan di biaha ta cosnan cu bo ta reconoce.
Por ehempel muchanan cu no ta comiendo, muchanan cu ta bira hopi bleek of muchanan cu ta haya un barica bol diripente. Mientras cu e man y pianan ta flaco. Ta cosnan cu en realidad ta e prome sintomanan. No ta papiando aki di Leucemia solamente. Tin cierto tumornan, manera tumor di musculo y tambe di riñon. Ta diferente tipo nan ta.
Loke ta bunita ta cu hopi biaha, ora e mayornan ta hopi atento, bo ta wak cu nan ta señala hopi tempran, sea cu e barica ta bol, of e mucha tin pia hincha, of e ta hopi bleek, of cu e no ta comiendo nada. Bo ta ripara e ora di biaha cu bo por haci testnan riba dje.
Dr. Rafael-Croes tin un mensahe: Cancer no ta un cos evitabel. Si bo ta atento bo por ta atento. Dios Gracia cu cancer di mucha tin un grado di supervivencia basta halto. A perde naturalmente algun mucha di cancer na Aruba. Tin cu bisa si cu mester ta conciente cu e por pasa cu tin mucha cu ta haya cancer. Cancer por bin bek. Segun Rafael-Croes, manera tur tipo di cancer, ta papia aki di remision ora cu el a cura, pero esey no kiermen cu el a kita por completo. Pesey ta bisa innerremisie. Pa e siguiente cinco añanan cu no haya e cancer bek, tin remision. Manera tur cancer, tur por bin bek. Pesey ta importante cu despues di e cancer, semper e hendenan bin bek y haci nan controlnan segun e schedule cu tin cu haci’e. Pesey e pediatranan tey pa controla e muchanan.
