Casonan activo pa COVID-19 a yega 287: cinco hende so tin den isolacion na hospital

2441

Por a tuma nota durante di e ultimo dianan, e casonan activo di COVID-19 a baha drasticamente. Pa loke ta e casonan di awe, el a yega na 287.

Loke ta restalta ta cu e casonan den isolacion na hospital riba e piso general ta na 5. Es decir un total di cinco persona ta interna. Den Intensive Care no tin ningun pashent di COVID-19 na e momentonan aki.

Segun resumen di awe, un total di 36 persona a recupera y tin un total di 15 caso nobo, di cual tur ta residente, (“positivity rate” bao di residente, ta 16%).

Total di e testnan haci ta 235, bao di e residentenan, testnan haci na laboratorio di hospital ta 96.

E total di casonan di fayecimento relaciona cu COVID-19 a aumenta na 34. Palabra di forsa na famia di e fayecidonan.

Pa por sigui controla e pandemia di Covid-19 ta importante pa comunidad ta alerto y na prome indicacion di sintoma tuma contacto cu dokter di cas pa por haci un test. Door di isola e casonan positivo nos por controla e virus y stop e di sigui plama.

Ban sigui cuida, Aruba ta conta cubo pa sigui maneha y controla e virus di Covid-19.