Corte den Prome Instancia a bay di acuerdo pa atende e caso sumario cu Partido AVP a entama contra Gobierno di Aruba, pa trata e caso awe diabierna pa 3:00pm. Abogado mr. Hans Sjiem Fat lo defende e partido politico cu mas voto den e ultimo eleccion awe den Corte. Defensa di Gabinete Wever-Croes lo ta den man di Departamento Huridico di Gobierno. E caso ta debi cu e partido politico a pidi pa tene un reunion politico diamars awor na MFA Noord. A acepta e huur, a firma e acuerdo y hasta a acepta e pago. Despues di esey MFA a yama bek pa bisa cu Gobierno no ta permiti pa organisa eventonan politico den MFA. E partido politico ta protesta contra e decision pasobra e mesun Gobierno aki a permiti partido RED organisa un evento politico pa celebra nan 15 añanan di existencia algun siman pasa den MFA Paradera.
Nos lo cubri e caso aki y lo tey for di Corte pa informa di e decision di Hues.
