Caso penal contra George Jamaloodin a cuminsa awe den Corte

Awe a cuminsa e proceso penal di tres dia contra di George Jamaloodin. Ta sospecha e ex Minister di Finansas den Gabinete Schotte di ta envolvi den morto di Helmin Wiels na aña 2013. Ta acus’e di a duna ordo na e sicario Burney “Nini” Fonseca pa mata e politico Helmin Wiels.

Ya caba e tirado Elvis “Monster” Kuwas y su “opdrachtgever” Burney “Nini” Fonseca a wordo haya culpabel den tur instancia y condena na bida largo. A hay’e culpabel di a comete asesinato riba Wiels. Tambe e ruman di Jamaloodin, e comerciante catochero Robbie dos Santos tabata sospechoso den e caso Maximus.

Den e caso, cu entretanto ta durando 6 aña, a interoga hopi persona prominente, manera ex Prome Minister Gerrit Schotte, ex Minister di Husticia Elmier Wilsoe, ex Minister Carlos Monk, ex Minister Carlos Trinidad y e doñonan di loteria, Rudy Pizziolo y Cocochi Prins. Di baina a divulga algo di e autornan mes.

Generalmente ta conoci cu Wiels, desde 2011, te na momento di su asesinato, tabata bezig riba e caso di e compania di telecomunicacion UTS y e datacenter CTEX. Eynan e tabata a punto di divulga evasionnan grandi di impuesto y tambe labamento di placa, alabes weganan di suerte online y tambe via SMS atrabes di e compania di Gobierno UTS y su centro di data IDG (Vredenberg) como tambe CTEX (Mahuma).

Tres dia prome cu asesinato riba e beach di Marie Pampoen, Wiels a papia cu Margriet Marbus di NRC Handelsblad riba e corupcion masivo door di bankero, accountants y desaroyadornan di proyecto den e mesun cuadro eynan.

Comments

comments