Caso Little Europe: Atraco Team cu entrada hudicial na Tanki Leendert

Den e accion di marduga a logra detene un sospechoso mas relaciona cu e caso di atraco na Little Europe cu a sosode 17 di october.

Un trabou extenso di parti Atraco Team for di e momento ey a tuma luga y cu a hiba na detencion. Dialuna marduga no tabata diferente, ta asina cu den oranan tempran e team di aresto a haci un entrada hudicial na un cas situa na Tanki Leendert. A detene un sospechoso nacionalidad Hulandes relaciona cu e caso. Polis di su banda no ta descarta cu lo por tin mas detencion.

Maximo esfuerso ta keda desplega y cu cada detencion Cuerpo Policial ta uza oportunidad pa manda palabra di apoyo na e miembronan di e Cuerpo cu ta haciendo trabou inmenso, tanto esnan di Atraco Team como demas Polis, pa pone mane riba e sospechosonan/ criminalnan riba nos isla.

E dia di atraco tabata dos homber, kendenan arma a drenta e negoshi y den forma rapido a bay cu cantidad di joyas. Un di nan a resulta herida, ya cu a haya sanger den e auto cu nan a laga bandona den e rooi banda di santana na Playa. E atracadonan eynan a subi den otro vehiculo y disparce. Autoridadnan for di prome instante a sospecha cu tin mas cu hende cu e dos atracadonan envolvi den e atraco aki.

Dia prome di november ultimo durane un inval en busca di mas sospechoso, a detene dos personal cu nan ta busca relaciona cu e caso aki. Na e momento ey tabatin dos persona caba deteni. Awo tin en total cinco (5) detencion den e caso di Little Switzerland.