Dialuna merdia Hues Comisario a dicidi di prolonga detencion di e homber Marvin Stennet, naci na Jamaica, acusa di violacion sexual di un mucha muhe di 24 aña di edad y tambe a prolonga esun di Franklin Sanchez, naci na Republica Dominicana, acusa di asesinato. Ambos ta cera for di den fin di siman, despues di un caso di violacion sexual den Flamboyanstraat na San Nicolas. E caso lamentabel aki a causa cu un tata, den su rabia, a sali di cas cu un machete y kap un di e violadonan te cu el a fayece na Hospital na San Nicolas.
Ta for di momento di e sucedido, a cuminsa scucha varios version di kico lo por a sosode na e cas na San Nicolas, cu a causa cu un tata bon rabia, a sali di su cas na Cura Cabay y regla cuenta instantaneamente cu e violadonan. E intencion probablemente lo tabata pa kap ambos homber, pues tata y yiu, pero no a logra pasobra e tata a sali na careda pa scapa su bida.
E sospechoso di asesinato, despues di su acto, a bay Warda di Polis na San Nicolas y a entrega su mes na autoridadnan. El a bisa di a cumpli cu su yiu, pa defende honor y dignidad di un di su 4 yiunan, como un mensahe na comunidad tambe cu no ta acepta mas abuso sexual sin consecuencia debido pa e abusadonan. E ta un caso extremo, pero algo cu por a spera masha dia, mirando e cantidad di casonan di abuso sexual, violencia domestico, violacion y hasta intimidacion sexual tumando luga den comunidad.
Entretanto e investigacion a cuminsa, canando paralelo cu e procedimento penal contra ambos sospechoso. Mester menciona cu e homber Marvin Stennet (sospechoso di violacion sexual) a scoge Abogado mr. Vito Carlo pa dun’e asistencia huridico den e caso aki. Di otro banda, e sospechoso Franklin Sanchez (sospechoso di asesinato) a scoge Abogado mr. Doris Canwood como su defensor durante e proceso penal cu tin contra dje awo. Ambos Abogado awor tin un tarea pisa pa representa nan clientenan den un caso “High Profile” den cual tin hopi emocion den comunidad pa ambos banda di e bataya penal aki.
Fuentenan cerca di e caso sinembargo a indica na nos cu e prome declaracion di Sanchez, cu ta tata di e victima di abuso sexual tabata hopi simpel. El a admiti di a tuma ley den su man, basa riba e informacion cu su yiu mayo a duna su mama, di cual el a bisa cu e mes ta regla e asunto. “Yo arreglo esto” tabata su ultimo palabranan ora sali for di cas y nunca mas a regresa pasobra ora el a caba di mata e hoben Jamaikino di 24 aña, e mes a entrega su mes.
Di otro banda, e homber Marvin Stennet a sali para duro riba su inocencia. E no ta compronde dicon e tata di e mucha muhe G. a actua asina y perde cabes. E ta acusa e homber di a mata su yiu inocentemente. Segun e tata, e relacion sexual entre e mucha muhe, su yiu homber y e mes, tabata consenti. E ta para riba cu na ningun momento por papia di violacion sexual den e caso aki pasobra e mucha muhe mes tabata kier.
E punto delicado y hasta dificil den e caso aki ta awor, cu e unico testigo cu lo por kibra e impasse entre e victima y e violado, ta morto. Pues tur cos ta mustra cu den Corte e lo bira un bataya entre e hende muhe bisando cu a viol’e y e sospechoso bisando cu ta un relacion consenti esaki tabata. Pruebanan awor lo mester demostra cua di e partidonan tin rason.
Di acuerdo cu informacion cu nos ta dispone di dje ta indica cu a efectua un “rape kit” na Hospital cu a confirma cu tabatin relacion sexual. Pero esey lo no por prueba violacion ainda, specialmente si un di e partidonan ta pareha di e victima y como tal por basa su mes cu tin contacto sexual. Ta e hecho cu e tata tambe a participa durante e acto sexual, contra boluntad di e mucha muhe, ta locual awor lo mester prueba. Nos tin indicacion fuerte cu tin prueba di uzo excesivo di forsa bruto cu a laga marca atras na curpa di e victima, cu lo por sirbi como un prueba na e Magistrado cu no ta un “simpel” relacion sexual a tuma luga.
Si sigui e declaracion di mama di e victima, ta trata aki di un mucha muhe masha bon mucha mes y cu no necesariamente ta mira e “malo” den ningun hende. Al contrario, tur hende pe ta bon hende y ta masha cariñoso. E famia aki specifico tabata nan bisiña pa hopi aña y como tal ta mira nan cu un “otro wowo” compara cu otro hendenan den comunidad.
E sospechoso ta splica autoridadnan por ehempel cu ta e mes a bay baha e mucha muhe na cas despues. Pues si tabata un caso di violacion, cu e mucha muhe lo a core sali subi caya y grita pa ayudo. E lo no a bay den auto cu e mesun violadonan pa bah’e na cas manera nada no a pasa.
Recherchenan di Jeugd en Zeden Politie (JZP) tin un trabou masha importante awor pa investiga e caso aki te den profundidad, pa saca afor tur detaye pa por desbarata tur posibel gañamento di ambos banda, pa presenta na Corte un caso balansa, cu hechonan concreto y cu prueba, di kico a pasa diaranson manece diahuebs ultimo na San Nicolas. Hecho ta si cu a keda dos famia atras den hopi tristesa y dolor.
