Caso di Ladronicia: A horta un suma cuantioso di 10 Mil dollar

6605

Awe mainta , den careda di 7:30 AM un persona ta bati alarma na momento cu el a tuma nota cu su tas a desaparece. Den e tas tabata tin un suma di 10 mil dollar como tambe documentonan importante manera entre otro visa mericano, paspoort Dominicano y documento cu ta permiti’e traha.

E caso aki a tuma luga den area di Sint Dominicus College cu De La Salle School. E persona en cuestion ta traha cu compania di limpiesa bandi caminda, na e momento cu e robo aki a sosode, e tas tabata den e vehiculo (pickup) cu na ta usa pa trabou. E persona a splica cu e tas tabata scondi parti abou y tapa cu paña blanco pa e no ta den bista. E vehiculo tabata na lock pero bentananan tabata poco baha.

Na memento cu polis a presenta, e persona a splice nan cu ta trata di un suma di 10 mil dollar. Pa ta excacto 6mil den dollar y 7mil den florin. E suma aki tabata den su posicion pasobra e tabata un pago cu el a ricibi pa compra di su propiedad (cas) na republica Dominicana. Nan a pag’e e suma aki efectivo mientras e resto lo ta paga na momento cu nan ta na e pais en cuestion. 

E persona tabata cambiando e placa na diferente station di gasolin pa asina e logra tin e placa completamente na dollar prome cu e biaha pa Republica Dominicana. Polis di su banda lo cuminsa un investigacion pero naturalmente e persona tambe a bisa di cuminsa puntra rond y busca ayudo di camara den vecindario pa asina logra localisa e ladron (nan) aki lo mas pronto posibel.