Dialuna tabata un dia di fiesta na Aruba, unda cu a celebra Dera Gai/San Juan. Tabata tin varios evento na e diferente centronan di bario.
Segun Ferdinand Ponson, vocero di Departamento di Bombero, nan ta contento cu e propagandanan ta bin mas hopi dilanti, caminda e hendenan ta bay ta siñando un tiki mas di nos cultura.
Esaki tin su pro, unda cu ta baha e candelanan rond di Aruba. Apesar di tur esaki, tabata tin basta candela. Pero si mira en general, el a baha hopi. Tabata tin un total di 47 melding, entre 300 pa 400 yamada a drenta. Normalmente den pasado e tabata yega entre 600 y 800 yamada. Tabata tin 200 melding. E biaha aki e meldingnan a baha masha hopi mes, cual ta haci Departamento di bombero contento. Por mira cu pueblo ta bira mas consciente di esaki y cuminsa busca e historia di nos cultura y no haci manera cu tabata haci antes di kima sushi.
Casi 400 yamada di candela a drenta riba Dia di San Juan
Casi 400 yamada di candela a drenta riba Dia di San Juan. Click link pa mas https://24ora.tv/3242jaG
Posted by 24ora on Tuesday, June 25, 2019
Tin hopi kimamento di sushi ainda, pero el a baha masha hopi mes riba nos isla.
Melding
Segun Ponson, mayoria di e meldingnan, tabata candelanan di yerbe. Tabata tin varios truck y officiernan riba caya dialuna. A parti nan den regio, di manera cu nan a bay wak e trabao prome y si ta necesario si e truck por yega eynan. Tabata tin algun situacion mas importante cu otro. Por ehempel ora cu tabata tin peliger di extension, sea na un cas of trailer, ta despacha e trucknan mas lihe posibel y no mandanan memey di tereno cu no tabata tin peliger pa e candela plama. Esaki tabata un stragegia cu a wordo haci dialuna, mescos cu e añanan anterior. Esaki a resulta hopi bon, di manera cu e trucknan por a bay e luganan cu mester a bay.
Tabata tin caminda unda cu e hendenan tabata rabia, pasobra nan kiermen cu e Brandweer ta yega ey y no ta haci nada. Tin cu compronde cu hopi melding a drenta principalmente despues di 6’or di atardi. Brandweer mester pone prioridad cua ta esun cu ta bay prome.
Huma ta algo cu tur aña tin, y tin e candelanan. Tin cu wak pa e candela no expande bay na cas di hende, daña propiedad y cuminsa conscientisa pueblo cu e humanan ey ta stroba.
Tin cu corda cu p’abao di cas semper tin bisiña, tin evento, tin casnan di anciano, tin luganan unda cu nan ta cuida mucha durante dia. Tur esakinan mester tene cuenta cun’e. E huma aki ta dañino.
Dialuna tabata tin dos truck p’ariba di brug, dos truck p’abao di brug, y tambe un pickup cu un pomp riba dje cu por a fungi mescos cu un brandspuit.
Tabata tin cierto luganan unda cu trucknan di Brandweer ta bin, paga candela y despues di algun ora tabata bolbe cende esaki.
Segun Ponson, a mira e fenomeno aki dialuna. E mes tabata tey presente unda cu a paga candela y e hendenan a bin bolbe bolter e sushi y peg’e na candela. Ta cosnan cu ta pasa y door cu tin asina hopi melding, ta bin tambe dilanti cu ta paga full rond di e candela. Door cu e candela ta bon controla e ora ey, cu no por expande bay ningun caminda, ta sigui pa un siguiente melding cu si por expande.
Na Tanki Leendert tabata tin un candela di mondi grandi, caminda cu e candela por a bula un banda di caminda pa otro, unda cu por a cende veld na candela. A manda Brandweer pa paga esaki p’asina evita cu e candela bira mas grandi y yega cerca di e casnan.
Brandweer ta gradici
Di parti di Cuerpo di Bombero, ta gradici tur e trahadonan cu a traha dialuna, cu a brinda esaki, trahando for di mainta cu e prome melding a drenta te cu anochi. E central tabata hopi activo y hopi bon organisa. E liderazgo tabata eynan unda cu a despacha trucknan trankil. Tambe ta gradici DCA pa haci esaki posibel, hunto cu nan Cuerpo di Bombero ta haci posibel cu candela ta baha na Aruba y hendenan ta cuminsa bay mas den direccion pa busca informacion di nos cultura na Aruba y siña hopi mas di esaki pakico e candelanan tey y asina cuminsa baha esaki un tiki mas y biba mas consciente.
