Diamars, probablemente den oranan di madruga, un caso di destruccion a tuma luga patras di edificio Cocolishi, sede di Gobierno.
Mainta basta tempran a pidi presencia di Polisnan patras di Cocolishi pa denuncia di destruccion cu a wordo cometi na un cashi yen di waya situa net na Centro Historico, specificamente banda di Plaza Padu.
A constata cu a kibra e cashi, a ranca wayanan, di entre otro fibra optico. E hecho aki ta mustra den direccion di un vandalismo, pa motibo cu eyden no tin nada di uzo pa cualkier ciudadano comun y coriente. Ta parce cu a kibra e box y a ranca waya pa loco.
E wayanan den e cashi aki tur ta sirbi pa Plaza Padu, unda cu por haci show di luz pero tambe show di luz den combinacion cu e awa cu ta sali di e fontein. E plasa aki cu ta rindi honor na nos Tata di Cultura, no ta den uzo pa hopi tempo. E fastioso ta cu e cablenan destrui ta material costoso y cu no ta obtenibel na Aruba.
Segun por a compronde, patras di Cocolishi no tin camara tampoco pa mira kende(nan) ta responsabel pa e acto di vandalismo aki.
