Casa a keha futuro Parlamentario Luigi Bergen pa abuso domestico

No ta algo di hopi dia, sino di dia 9 di juli 2019, cu casa di e futuro Parlamentario Luigi Bergen a keh’e na Recherche pa abuso domestico. E casa, Melissa Bergen-Kock a bay Polis y a keha Luigi Bergen di lo a maltrata nan yiu muhe, pasobra e no kier a bay scol. E mama a bisa Polis cu Bergen a dal e mucha di tal forma, cu el a keda traumatisa te dia di awe y ta na man di Psikiatra pa tratamento profesional.

Desde e caso di abuso domestico aki, e yiu muhe ta sufriendo di hiperventilacion. Den un carta di su Dokter di cas na e psikiatra di mucha, e ta pidi pa dune mas tratamento pasobra e mucha ta haya ataca den klas na scol.

Loader Loading...
EAD Logo Taking too long?

Reload Reload document
| Open Open in new tab

Download [591.58 KB]

Den e carta di Dokter por lesa cu esey a bin despues cu e tata a maltrata e mucha, dor di push’e dal’e den muraya di cas. Hasta a bay asina leu cu scol a entrega e caso den man di Bureau Sostenemi pa ayudo na e famia aki. E mama a conta Polisnan tambe cu Bureau Sostenemi a manda carta cas ofreciendo ayudo y “marriage counseling”, pero cu Bergen a nenga.

Den e keho oficial na Polis por lesa cu e tres yiunan tur tin miedo di nan tata pasobra tur a bira victima di abuso domestico. E mama tambe no a scapa di maltrato den cas. Ta obvio cu e pareha ta pasando dor di un proceso dificil di divorcio, pero esey no ta hustifica e abuso domestico aki.

Contrario na Minister, un Parlamentario no mester pasa screening. Asina ms Bergen awe mainta a presenta un copia di su “bon conducta” di Ministerio Publico. Hecho ta cu e caso penal contra dje no a bini padilanti ainda pesey e no tin un “strafblad”. Locual VDA (Veiligheids Dienst Aruba) si lo por a haya den su “file” ta keho oficial na Polis y na Bureau Sostenemi pa abuso domestico di su casa y su yiunan. Ta con un persona asina awor por bira Parlamentario y ta un “ehempel” pa comunidad si ni pa su famia e ta un ehempel? E ta laga espacio pa haci pregunta na Gobierno si esaki ta considera integridad, pa tin un persona di cual Gobierno ta na altura di su actonan, pasobra e propio Minister Chris Romero a suspend’e, pa awor dun’e e premio pa haci’e Parlamentario di pais Aruba.

Luigi Bergen a logra no mas cu 187 voto den eleccion di aña 2013, mientras cu na september 2017 a logra no mas cu 237 voto riba su nomber. Bergen ta un docente di scol, antes na IPA y ultimo Colegio EPI.

Tocante Luigi Bergen

Siendo un docente na Colegio EPI, Luigi Bergen a haya 187 voto riba su nomber den eleccion di aña 2013. Sinembargo, na september 2017 e tabata candidato number 16 riba lista di MEP y a haya cu 237 voto riba su nomber. E lo ta e di dos Parlamentario cu menos voto di MEP, debi cu e record awo ta di Daphne Lejuez cu solamente 196 voto.

Bergen a campaña hopi pa elimina schoolgeld y kita aircogeld for di mayornan pa yiunan por bay scol sin gasto. Pero MEP no a haya e cartera di enseñansa y como tal el a bay traha como Consehero di Minister Chris Romero awor den Ministerio di Transporte Publico y Comunicacion. Bergen a haya varios funcion den fundacionnan y companianan estatal pa representa interesnan di Gobierno, cobrando un salario adicional na cada un di e companianan aki. Tur e entradanan aki lo mester stop awor cu e drenta Parlamento.