Diabierna marduga, pa exactamente 3:00am a drenta un yamada di un cas na candela na San Nicolas. E prome unidad di Bombero pa yega na e sitio a constata cu ta trata aki di percela Adolf van Nassaustraat # 15, situa net na e skina di Adolf van Nassaustraat y Willem de Oudestraat. For di yegada di Brandweer a nota vlamnan grandi di candela cu a domina e cas y tabata menasa e casnan den vecindario
Ex-Pension no habita pa hopi aña
E edificio awendia ta bandona, den pasado e tabata un pensioen. Bisiñanan a conta nos cu a traha e edificio di dos piso como 60 aña pasa pero e tin mas o menos 30 aña caba no habita, aunke cu ta conoci cu un adicto ambulante ta keda eyden.
Candela ta molester y alivio
Pa e habitantenan den e bario, e candela tabata un molester pero tambe un alivio. Nan ta spera cu awe un era nobo ta cuminsa den e area. Nan a roga tur Minister y politico durante e ultimo 30 añanan pa basha e luga abou, pero sin resultado. Parce cu Gobierno tin problema pa localisa e doño of su herederonan. Consecuentemente a biba cu e molester di adictonan cu ta frecuenta den e edificio pa uza droga y haci tur sorto di fechoria eyden!
Polis a evacua henter e area
Dos unidad di Bombero a combati e candela. Cu ayudo di Polis, a evacua e casnan den vecindario, den un esfuerso pa preveni cu si e candela expande, cu e por hinca e bisiñanan den peliger. E cas a kima por completo.
