Personal di Gabinete di Minister Plenipotenciario y di ATA Europa a tene riba 24 di januari, na antesala di Dia di Betico, un ceremonia pa recorda natalicio di Sr. Gilberto Françoise “Betico” Croes (dfm), politico y estadista Arubiano.
Minister Plenipotenciario Guillfred Besaril, Director a.i. di Arubahuis mr. Glenn Ling y director di ATA Europa Tirso Tromp a pone un flor na e busto di Betico Croes.
Prome cu e acto aki sr. Besaril a tene un discurso. E mandatario a scohe pa elabora un poco riba e aña 1985 pa ilustra e situacion di Aruba na e momento aki. ‘Por wel cu na e momentonan aki nos ta tuma desicionnan caminda bo ta bisa nan ta duro, pero a lo largo bo ta bai mira cu na 2020, 2021 y sigur 2022 un biento fresco lo supla pa motibo cu durante 2018 y 2019 desicionnan dificil a wordo tuma na bienestar di loke ta e finanzas publico, desaroyo economico y sigur desaroyo social di pais Aruba.’
‘Dicon mi ta bai bek na aña 1985. E tabata un aña hopi transcendental pa Aruba. Tabata e aña cu LAGO a disidi pa stop cu e refeneria despues di mas cu 60 aña. Aruba no tabata conoce den e periodo ey un desaroyo economico manera awe. E industria turistico no tabata mesun desaroya manera cu e ta awor. Pero desicionnan dificil mester a wordo tuma. Y ta na un momento asina bo ta demostra vision y amor pa bo pueblo.
Pasobra sr. Betico Croes (dfm) a pone pueblo dilanti di populismo di su mes como politico. Desicionnan dificil cu 5 pa 7 aña despues expertonan den finanzas publico y economico a bisa kico tabata di Aruba si e desicionnan no a wordo tuma na 1985. Pero tambe desicionnan dificil cu a coste un eleccion y muy probablemente tambe su bida. Un bida cu no a mira su gran logro loke tabata Status Aparte,’ asina sr. Besaril a bisa.
E mandatario a sigi bisa cu esaki no solamente ta momentonan den historia di un pais, pero tambe un historia personal di un gran estadista. Besaril: ‘Unda ela pone su mes un banda na bienestar di un pueblo cu semper ela stima. Pasobra tuma desicionnan manera e famoso 8.2 ( extra belasting riba bo salario) no tabata nada facil. Pero ela hacie cu un vision mirando na unda nos finanzas publico ta, drentando un Status Aparte, y unda nos kier bai. Tur esaki tabata un decision unda ela pidi solidaridad. Pues pesey mi ta para na 1985. Pesey awe ta importante pa corda con grandi sr. Betico Croes tabata como persona y cuanto amor ela duna y ki ehempel ela laga atras pa nos.
Ehempel cu nos mester sigi y cu awe nos por mira atras riba un industria turistico mas stabil, otro aspectonan economico mucho mas interesante cu perspectiva hopi mas fuerte. Nos ta mira cu e unico cos cu nos mester haci ta tuma curashi. Esey ta e lesnan cu ela laga y mi ta kere cu awe ta importante pa nos reflexiona riba e lesnan aki,’ segun Minister Plenipotenciario Guillfred Besaril. E ceremonia a keda clausura cu canto di nos himno nacional Aruba Dushi Tera.
