Diadomingo, algo pasa di 1’or y 50 di marduga, varios patruya a ser dirigi na e bocht di Sero Patrishi, caminda lo tabata tin un cas completamente na candela. Mesora polis a bay na e sitio menciona y a topa en berdad cu e cas completamente na candela. A despacha urgentemente, unidadnan di bombero, pa nan por paga e candela aki. Bisiñanan ta conta polis cu nan a sinti un explosion y na momento cu nan a bay wak pafo a wak e cas na candela. Tambe polis a wordo informa cu un adicto ambulante ta biba aden, teniendo cuenta cu e cas aki ta bandona. E cas riba su mes, a kima completo y no a resta net nada. Brandweer a logra paga e candela, pero no por a haci mucho. Ta lamentabel cu e cas a haya un final asina tragico, mirando cu ta trata aki di un cas estilo di antaño. Awo tin cu bay busca drechi di esnan cu supuestamente ta doño di e tereno, pa asina busca manera pa sloop e cas, mirando cu e no ta habitabel mas den e estado cu el a keda despues di e candela.
