Diadomingo anochi alrededor di 11:20pm a bati alarma pa un cas na candela. Bomberonan a yega y topa cu Venezuelastraat # 30 na candela y a cuminsa combati vlamnan grandi mesora. Den un rato tabatin e candela bou di control. E infrastructura ta mustra bon, pero e cas a haya hopi daño paden, specialmente den e cambernan. E cas tin algun siman bashi, segun bisiñanan. No ta conoci causa di e candela.
A compronde cu ultimo tempo ta huur e cas cu Venezolanonan cu ta keda eyden den grupo. Pero ta algun dia caba, specialmente despues di Pasco, cu testigonan ta mira e cas cera y sin ningun movecion. No tin indicacion cu lo tabatin hende den e cas na momento cu e candela a cuminsa. E cas net den banda tambe ta bashi, pues ningun hende mucho cerca pa mira nada.
Por lo menos 2 unidad di Brandweer a presenta na e sitio pa por a combati e candela. Polis ta investigando e causa di e candela awor.
