Dia 2 di april 2019 UPP a dirigi cartanan na e.o. Minister Otmar Oduber y tambe na Minister Xiomara Maduro cu e peticion pa duna copia di documentonan referente e “destaho bou man” di un incinerator pa kima “sludge”, desperdicio medico y cadavernan di animal. Ta trata di un proyecto cu ta encera compra di un incenirator y e operacion di esaki pa 5 aña. E proyecto lo costa por lo menos 15 miyon florin. Den e documentonan cu por a lesa, a bin compronde cu pa compra di e incinerator lo uza 1.7 miyon florin procedente di FDA.
Diabierna ultimo Partido UPP a ricibi un carta di Minister Otmar Oduber notificando cu el a manda e “bezwaar” pa LAR. Esaki obviamente pa tarda cos, pero UPP lo laga Corte dicidi si nan tin derecho pa haya copia di e documentonan of no. Booshi Wever ta supone cu e motibo principal di Minister Otmar Oduber pa no duna e documentonan ta simplemente pa pueblo no haya sa con el a priveligia un amigo cu gañamento y corupcion. Pero aki cos no a caba! Ayera pa gran sorpresa di UPP, nan a ricibi un carta for di Minister Xiomara Maduro bisando UPP cu e no tin ningun conseho di ningun departamento cu ta cay bou di su responsabilidad. Algo hopi peculiar y insolito!
Te asina leu cu nos sa, cu ora trata un destaho bou man esaki mester sosode cu consentimento di Minister di Finanzas, ya cu riba e Ministrieele Beschikking mester ta poni “in overeenstemming met”. Pues aki ta trata di un MB pa un destaho bou man, cu mester tin firma di e Minister di Finanzas. Awor con ta posibel cu Minister di finanzas ta firma un MB sin conseho ni di su propio departamentonan, manera Departamento di Finanzas y CAD y ni di departamento Huridico.
Y mas straño ta cu e Minister no ta ni pidi nan tampoco. Ni di FDA! Ta kico anto? Ta firma “bij het kruisje” atrobe sin mira kico Otmar Oduber ta bezig cune? Of Xiomara Ruiz-Maduro ta kere cu e por laba su man pasobra e no kier ta participe den e actonan coruptivo cu Otmar Oduber ta cometiendo? E contesta di Minister Maduro ta liña recta contra loke su persona mes y su partido a bin ta denuncia durante e gobernacion anterior, esta falta di transparencia y integridad.
No ta Minister Maduro so ta laba man, pero tambe Parlamento y un organisacion manera ATIA cu ta laga su representante aproba tur e corupcionnan aki, esaki hunto cu e representante di sindicatonan. Unda SEPPA, FTA, TOPA etc etc a keda? Of ta scoge un biaha mas pa laga Gobierno masacra e pueblo pa despues bin bisa: “Yo no fui?”
Con ta posibel cu e Minister cu mester percura pa nos finanzas publico ta bon cuida, ta permiti Minister Otmar Oduber “sjoemel” y “knoei” djis pa complace cu amigonan y cuidou cu e no ta yuda laba placa sushi y mancha cu sanger di e pueblo Venezolano por medio di “stromannen” aki na Aruba?
Nos mester tin “free enterprise”! Pero esaki no por conduci na “free for all” pa motibo di corupcion, tampoco esaki mester bay para bira un “wild wild west” na unda esun cu ta mas ladron of esun mas corupto ta sali victorioso y e pueblo mes ta esun cu al final lo mester bay paga pa e “wild wet party” aki. Y manera Minister Maduro mes a bisa den pasado, cu nos pueblo lo bay paga pa un pachanga cu e no a wordo invita!! Y mientras tanto Parlamentarionan ta den un soño profundo.
E carta ta firma dor di Booshi Wever, Lider UPP, dia 7 di mei 2019 na Brazil 163.
