Minister Oduber: Carta di specialistanan ta mustra un mocion di desconfiansa den gerencia di hospital

E preocupacion di hospital no ta di awo. Segun minister di Salubridad Publico, Dangui Oduber, a bin hereda lamentablemente un desaster. Si wak e proyecto di construccion di gobierno a hereda, lamentablemente tur loke a bisa den oposicion, awe ta bin haya rason.

Ta bisa lamentablemente, pasobra na final di dia ta nos tur hunto tin cu bay paga pa un hospital cu no ta bal e placa. A bisa for di un principio cu e compania cu a gana e bidding, cu ta Arellano, cu a bisa cu tabata un fixed bidding, cual ta den ultimo fase pa cuminsa cu un investigacion forensico.

 

E compania a bid y den su prijs a bisa delanta cu considerando e hecho cu ta un proyecto di renobacion y expansion di hospital, ta un proyecto compleho, ta inclui den e prijs cinco porciento meerwerk. E cinco porciento meerwerk eynan awe a resulta di ta 50% meerwerk.
Ta papiando caba di un budget overrun di 110 miyon florin caba riba e prijs inicialmente cu nan a bid. No solamente esey. Ora cu a drenta gobierno, a sinta cu SOGA, a sinta cu Gerencia di Hospital, a sinta cu e projectmanagernan y nan a bin cu peticion cu kier haci algun cambio.. Fuera di tur e cambionan cu nan a haci caba, lubida sala di operacion, lubida cushina, lubida microbiology, lubida sala di emergencia. Tur esakinan a wordo lubida premedita. No por bisa awe cu lubida un sala di operacion, cu ta e curason di un hospital.

Awe nan ta bisa esey. A sinta y a bisa cu nan kier haci algun cambio. Kico e implicacion financiero e tempo ey cu e cambionan aki? Lo a añadi un 35 miyon florin riba e 110 miyon.
E minister a bisa bon cla den e reunion cu “sky is not the limit.” E no ta bay di acuerdo cu ningun cambio mas. E budget cu a resta presupuesta pa caba e proyecto, ta caba e proyecto cune. Si den futuro mester haci e cambionan aki, lo mira con pa financi’e. Pero como minister responsabel, Oduber no ta dispuesto pa bay parlamento, pa add un otro 35 pa 40 miyon riba e budget cu ya caba tabata 110 miyon riba e budget inicial.

Un di e preocupacionnan tambe cu e specialistanan a indica den nan carta, ta un serie di preocupacion. Ta considera e carta aki sigur un mocion di desconfiansa pa maneho di hospital, pa gerencia di hospital y sigur pa e hunta di supervision, pasobra e hunta aki ta suppose di controla e maneho diario di hospital.No kier sembra panico bao di nos comunidad, na momento cu a ricibi e carta aki. No a ricibi e carta oficial di e specialistanan. Obviamente a tuma nota di tur e preocupacionnan aki. Como minister responsabel a dirigi un carta pa hospital y no solamente a pidi nan splicacion por escrito, basa riba cada un di e puntonan aki a wordo treci dilanti door di specialistanan, kico nan a haci of lo ta haciendo al respecto, pero ki accion concreto nan ta bay tuma tambe pa trece trankilidad bao di e specialistanan y garantisa cu e servicio cu nan ta brinda, na ningun momento salud publico ta core peliger.

Na e momentonan aki ta un hospital tin. No kier crea e impresion cu tin asina tanto problema cu no por garantisa servicio. Esey no ta e caso tampoco, segun Oduber.
Pero e preocupacionnan di parti di e specialistanan, gobierno ta considera nan serio. Ta atendiendo cu esaki na e momentonan aki. E problema cu tin, mesun problema atrobe cu fundacionnan, no sa ta cua gobierno den historia a permiti esaki. Pero en todo caso e mesun problema cu tin na Fundacion Lotto pa Deporte, tin na Stichting SABA, tin na Stichting Ziekenhuisverpleging, cu tin un hunta di supervision cu ta consisti di 7 boardmember. Gobierno tin solamente 2. Den parlamento a discuti esaki. Te hasta e fraccion di AVP a trece preocupacion dilanti cu den nan opinion, mirando e hecho cu ta AZV ta esun cu ta cubri tur gasto di hospital cu ta casi 180 miyon, ta na su luga pa tin un mayoria den e hunta di supervision.

Si en caso gobierno tabata tin e mayoria, hopi tempo caba accionnan lo a wordo tuma pa loke ta bin ta pasando. Ta un serie di loke ta bin ta pasando. Gobierno ta pensa cu hospital no ta haciendo lo necesario pa trece cambio den maneho, pa trece mehoracion den servicio. Tin hopi presion den comunidad pa mehora e servicio. Y ta tene cuenta cu esakinan tambe. Gobierno ta en espera di carta di Raad van Toezicht di hospital, mirando e carta cu a manda pa nan, wak kico ta contesta. A base di e contesta ey, lo sa di tuma un posicion y lo sa caba kico ta e accionnan concreto cu gobierno tin pensa di bay tuma pa purba trece trankilidad entre e specialistanan y garantisa comunidad cu ta bay tin cambionan drastico den hospital.