Carlos Vilches: Tabatin rasonnan valido pa a kita empleada for di trabao

Excellent Manpower Services a reacciona riba e caso publica awe riba 24ora.com, di e señora cu lamentablemente no ta den servicio mas cerca nan. Director di e compania, Carlos Vilches, a splica cu Marriott no kier a sigui traha mas cun’e. Den entrevista di e dama, e no a splica na e miho manera loke a sosode. Normalmente ora di retira un di e trahadonan, mester tin prueba y investigacion di kico a sosode. Den e caso aki tabatin cierto cosnan pasando cu no a menciona. No kier difama nomber di e persona tampoco, segun Vilches.

Carlos Vilches: Tabatin rasonnan valido pa a kita empleada for di trabao

Carlos Vilches: Tabatin rasonnan valido pa a kita empleada for di trabaoClick link pa mas: https://24ora.news/2uas508

Posted by 24ora on Thursday, January 16, 2020

Pero esey a hiba na e decision cu e cliente no tabatin mester di e servicio di e persona aki mas. Pa e motibo ey, e compania mester a tuma e decision pa duna e señora aki su retiro. Di un otro banda kier yud’e pa e haya un otro trabao, aunke awo el a hay’e caba. Vilches a sigui splica cu kier a informa cu nunca no ta tuma un decision di manera arbitrario sin sa e motibonan pakico e persona ta wordo kita. Tambe, semper ta tene na cuenta cu necesidadnan di nan clientenan. Como Uitzendbureau ta mara na ley y tin contractnan cu ta permiti nan pa keda cu e personal si e cliente no kier nan. Esey tambe ta para riba e contract cu e trahadonan ta firma. Pero si ta percura pa nan haya e miho beneficio y miho trato posibel cerca e compania.

Sosten
Den e video publica riba 24ora.com, Vilches a splica cu no ta asina cu nan no ta duna sosten na e trahado. Nan tabata sa kico e caso tabata andando caba y tabata sa kico tabata pasando caba cu na diferente ocasion a wordo trata. Pesey e decision a wordo tuma cu base valido cu mester a duna e dama su retiro.

Retiro via Whatsapp
Vilches a confirma cu si a retir’e via Whatsapp, mirando cu a yam’e na varios ocasion. A tuma e decision pa manda Whatsapp despues di 4’or di atardi, pasobra e no por a presenta na e siguiente dia na pia di trabao. E decision a wordo tuma cu e no ta den servicio mas. E proceso di retiro a cuminsa y un di e pasonan pa retira trahado ta pa informa nan prome cu nan no ta den servicio mas y pa nan pasa na oficina pa por continua cu e proceso di retiro. Te cu por a haya e dama y por a papia cun’e y comunica tur loke mester a comunica. Tambe lag’e sa cua ta su beneficionan cu e tin derecho riba dje a base di ley. Asina e por dune su carta di retiro cerca e compania y por sigui su caminda na un otro caminda.

Dianan aden
Vilches a splica cu e compania ta percura pa haci e pagonan na e manera corecto. Semper ta tene na cuenta dianan di vakantie, sea cu nan ta trahando cu nan. Ta mira tur e dianan cu nan ta acumula, pa e tempo cu nan ta trahando cu e compania y semper ta percura pa paga nan dianan di vakantie, salario acumula te e momento ey y cualkier otro beneficio cu bin acerca.

Vilches ta lamenta cu cos mester a bay asina leu cu e dama a trece dilanti den medionan di prensa. Semper tin dialogo y por palabra cu e personanan, papia cu nan y drecha e situacion, haci’e na e miho manera. E situacion aki a wordo uza na un manera pa haci propaganda den cierto manera y esey Vilches ta haya cu no ta yuda comunidad di Aruba mirando e situacion cu ta aden awor aki. Mester sostene tur hende y nan ta haciendo lo maximo. E ta un tiki fastioso cu haciendo bo best, tin biaha situacionnan ta daña nomber di compania, mirando cu no tin un comprondemento completo, di cosnan cu no ta corecto, Vilches a finalisa bisando.