Ta parce cu e compania Sociedad Area de Ibague (SADI) no a aprecia cu nos a publica e reto cu nan ta aden awo pa cu e contract cu nan a cera cu Gobierno di Aruba pa ofrece servicio di Helicopter na Polis di Aruba. Nan a nenga cu nan a menasa di bay bek cu nan helicopter Colombia si no regla e asunto di luga pa tank combustibel y pago di tarifa pa ateriza y lanta vuelo na FBO (Aeropuerto priva) di Aruba. Claro cu nan comunicado no ta cuadra cu berdad y nos ta dispuesto pa retanan na cualkier momento pa nan sa cu nos tin hopi wowo riba henter e proceso di “destaho” y maniobranan dudoso y cuestionabel aki na Aruba.
Den un carta cu nan a manda na medionan di comunicacion, e compania Colombiano a rechasa tur alegacion cu nan lo kier stop di opera na Aruba. Nan a admiti si cu e Director ta na Aruba pero no ta bisando cu el a pasa na tur e entidadnan pa mustra su disgusto con Gobierno ta tratand’e.
Pero locual mas a hala nos atencion ta e hecho cu e comerciante procedente di Colombia ta sigura cu abogado Dello Gomez of su bufete (cu ta(bata) di Andin Bikker tambe), lo no ta envolvi den e procesonan na Aruba. Claro cu e Director di e compania cu a manda e comunicado cu e mes no a skirbi, pero si a firma, hamas ta compronde cu Aruba ta un isla masha chikito mes. Por ehempel e lo no compronde cu coleganan abogado mes a facilita con abogado Gomez cu “no” a representa SADI, tabata busca compania riba “shelf” pe.
Es mas, nos kier puntra Carlos Eduardo Restrepo-Osorio si e sa cua abogado a busca su permisonan pe? Na e instancianan di Gobierno? Si e mes no ta kere cu esey ta un conflicto di interes na Aruba? Por ehempel ken a atende cu e su AOC na Departamento di Aviacion Civil pe, cu by the way no ta cla ni entrega ainda? Pregunta ta con e avion por ta bulando mes!
Ta bin acerca cu lo ta bon pa e Camara di Integridad di Aruba, investiga con bin Gobierno a bay “deal” direct cu e compania na Colombia. Pasobra dia di e destaho, e compania a conta cu sosten di e conocido piloto Efi Tromp di Aruba. Diripiente despues di e destaho, Gobierno a informa e participantenan, entre otro Efi Tromp, cu dor di presupuesto lo no sigui cu e proyecto aki mas.
Pa sorpresa di tur e 15 companianan participante, despues diripiente a tende cu Gobierno (y por adivina via cua abogado) a bay Colombia y despues invita e comerciante pa bin den su avion priva Aruba, pa cera un acuerdo directo sacando Efi Tromp afo. Acaso Carlos Eduardo Restrepo-Osorio ta na altura “kico” a pidi di Efi Tromp y ora el a nenga di cumpli, a sak’e for di e deal?
Nos tin un lista largo di “coincidencianan” den e oferta aki y specialmente e sumanan envolvi y tur e partnernan cu awor ta den “guera” cu otro relaciona cu e mas di 200 mil dollar cu ta costa e pagado di impuesto pa e Helicopter aki.
Otro siman, un di e participantenan na e destaho aki, cu un oferta mita di esun Colombiano lo ta na palabra. Ta parce cu SADI, Minister Andin Bikker y Gobierno di Aruba ta para dilanti algun caso civil den Corte relaciona cu un destaho masha cuestionabel, dudoso y cu participacion ACTIVO di figuranan prominente rond di e mandatario den e proyecto aki.
Ta bon pa aclaria cu na Colombia, tres aña pasa e mesun compania SADI aki a haya nan mes den basta noticia negativo relaciona cu biahenan di placer pa mandatarionan Colombiano a cambio di contractnan cu Gobierno di Colombia. Aki e mesun compania tin dos avion priva tabata bin constantemente Aruba.
E pregunta ta si tin conseheronan of coordinadornan di Gobierno cu a haci uzo di e posibilidad aki pa biaha “gratis” den avionnan priva di SADI prome cu e otorga nan un destaho publico cu e mesun Minister a bisa di cancela debi cu no tin presupuesto mas. Diripiente a scoge un di e 15 companianan participante y duna nan e contract, balora na por lo menos dobel di otro participantenan. Y awo, chens ta grandi cu e suma lo bira 3 biaha locual MEP tabata paga pa e mesun servicio aki entre aña 2003 pa 2014 debi cu gastonan a subi.
Otro siman nos tin mas, incluyendo entrevistanan cu participantenan local y internacional den e proyecto “dudoso” di Helicopter. Ta pesey un conseho masha special na SADI: Calladito te ves mas bonito!
