Diabierna mainta pa atardi a tuma luga tratamento di e caso penal contra e 5 miembronan di tripulacion di e tugboat Gracia cu dia 14 di October aña pasa a wordo intercepta cu un cargamento di 2253 kilo di cocaina. Ministerio Publico a pidi 12 aña di prizon pa cada miembro di tripulacion.
E tugboat tabatin un rato straño saliendo for di Venezuela, pasa Colombia pa bay Trinidad y Tobago pero a drenta awanan di Aruba. Ta sospecha cu un di e momentonan cu e tabata cerca di costa di Aruba, Colombia y Venezuela e cargamento a wordo subi abordo.
E motibo cu ta yega na e conclusion aki ta pasobra na diferente occasion e señal satelital di e tugboat a cay afo y no tabata sa cual tabata nan posicion. Tambe a constata cu dado momento nan tabata nabega ariba’bou dilanti costa Venezolano, cual no ta normal pa un nave cu tabata bayendo rumbo pa Trinidad and Tobago. Esaki ta un area conoci pa autoridadnan unda cu tin contrabanda di droga tumando luga y ta hustamente durante e maniobra ey cu e sistema di AIS no tabata cendi durante mas cu 24 ora. E Sistema aki por cay afo door di un corto circuito, pero e lo mester afecta tur sistema di nabegacion. E otro posibilidad ta cu intencionalmente a paga e sistema.
E acusadonan Yuri Chiriguayo Montenegro; Carlos Closier Hernandez; Jose Chiriguayo Reyes; Hendrick Hernandez Cedeno y Hervi Rodriguez Leones a nenga categoricamente di sa algo di e droga, cu tabata scondi den 83 bulto.
Autoridadnan Colombiano a bati alarma cerca Kustwacht di Aruba, pa tira un bista pasobra tin fuerte sospecho cu tin droga abordo di Gracia. Fiscal a bisa cu e cantidad di droga aki, sea di Venezuela of Colombia, den e bisindario aki lo tin un balor di 3.3 miyon florin. Pero riba mercado Europeo e prijs ta mas cu duplica.
E biahe aki supuestamente a wordo organisa door di un tal Jackson, kende ta e doño. Fiscal ta mira e acusadonan como contrabandistanan y no e organisadonan y mirando cu niun ta papia di nan envolvimento, ta trata nan tur igual.
Pa loke ta e castigo, Fiscal a guia su mes pa loke Hof ta bisa, pero cu no ta yega mas leu cu caso nan di 25 kilo. El a dicidi di sigui e indicacion duna den un caso reciente di mas cu mil kilo unda cu a pidi 8 aña. Mirando e cantidad hopi mas halto, el a pidi 12 aña pa cada un. Aki tres siman e lo dicta su sentencia.
