Capita Selecta: Responsabilidad y Libertad Academico na Universidad di Aruba

Diamars atardi 4 di februari 2020 den Aula di Universidad di Aruba profesor Bakker a duna un les pa studiantenan di e programa Organization, Governance, and Management (OGM) den forma di un dialogo cu e titulo “The good society, academic freedom and the responsibility of universities and academics”.

Profesor Bakker ta un sociologo y profesor na Universidad di Utrecht. Desde 2014 e ta duna sosten regular na calidad di e programa di Organization, Governance and Management (OGM), cu proyecto educativo administrativo y e ta yuda profundisa tema relevante di OGM. Su specialidad ta intervencionnan pa atende y posiblemente soluciona reto den comunidad. E les aki, yama Capita Selecta y ta e di dos pa e aña academico aki. E prome lector a ser duna door di Profesor Noordegraaf na november ultimo y e tema tabata ‘Public Value’ di OGM. Profesor Noordegraaf tambe to sostene OGM regularmente cu calidad y innovacion di e programa y investigacion.

E biaha aki e tema principal di Capita Selecta tabata; kico ta e responsabilidad di cada studiante pa cu e mundo academico. E les tabata un les interactivo y e studiantenan a haya diferente tarea. E prome tarea tabata cu e studiantenan mester a discuti y presenta kico segun nan ta un bon comunidad (good society). Despues di 15 minuut e gruponan di 5 of 6 studiante a presenta cu nan ta haya cu un bon comunidad tin un proceso democratico inclusivo y cu miembro di comunidad ta eherce responsabilidad propio. Ademas e studiantenan a trece dilanti cu tin integridad, reciprocidad, y un nivel di civismo consciente.

Pa e di dos tarea e studiantenan mester a discuti y contesta tres pregunta despues cu profesor Bakker a duna un splicacion di kico ta un comunidad habri (open society). Den su splicacion profesor Bakker a presenta tambe kico e academiconan ta pensa ta a rekistonan pa sigura un sociedad habri y saludabel. E preguntanan di discusion di profesor Bakker tawata lo siguiente; Si Universidad di Aruba tin un responsabilidad pa contribui na un sociedad habri, y dicon. Si Universidad di Aruba tin un responsabilidad pa proteha libertad academico, y dicon y si e studiantenan tin un responsabilidad awo como studiante, y despues como profesional, pa contribui na e sociedad habri y pa proteha libertad academico. Tambe ta puntra pa nan elabora con esaki lo mustra den nan actitud.

Ta interesante pa menciona cu e studiantenan ta haya cu Universidad tin e responsabilidad pa contribui na un sociedad habri, tambe habri e porta pa un dialogo sensitivo y cu personanan cu porta tin opinionnan of ideanan menos popular. A presenta si cu mester tin condicion bou di cual ta haci e dialogonan sugeri. Tambe a presenta cu lo mester ofrece mas oportunidad pa entrena pa dialoga, debati y ta mas critico. Por ultimo a presenta tambe cu mester crea plataforma pa discuti investigacion conducidor di e studiantenan.

Como futuro profesional a sugeri cu e studiantenan mester ta conciente cu ora nan sali como un OGM-er y nan papia cu miembro di comunidad nan sa cu nan ta haci otro pensa critico, embarka riba un trayectorio critico y academico (journey), compartiendo nan conocemento. Contribui na un comunidad basa riba data (cientifico) y haci esfuerso pa ta e cambio cu bo kier ta den e comunidad.

Na final di su presentacion a pidi e studiantenan pa pensa riba algun pregunta general:

Kico ta e retonan y oportunidadnan pa un comunidad habri na Aruba?

Kico ta e retonan y oportunidadnan pa e responsibilidad cu Universidad di Aruba tin pa promove un comunidad habri na Aruba?

Profesor Oostindie, profesor di estudionan Colonial y Post-colonial cu tambe a asisti e les a duna palabra di clausura y a corda e studiantenan pa ta critico, pero pa tuma nota cu ora nan ta den un debate nan por ta berdaderamente critico pero una bes cu e debate termina nan por ta cordial y respetuoso. E la haci e yamada aki pasobra e ta haya cu hopi biaha den comunidadnan chikito ta laga di ta critico den nomber di respet.