Nos ta den un temporada di actividad, unda cu hopi hoben ta riba caya y ta bishita. Esta e temporada di Carnaval. Famia Planea Aruba (FPA) ta cana un extra mile pa conscientisa e hobennan.
Evelyn Ras-Yarzagaray, directora di Famia Planea Aruba, a splica cu nan ta prepara pa e temporada. Naturalmente ta traha henter aña bay. Desde I love My Body, esta 2011, Famia Planea a tuma un otro strategia.
No ta solamente enfocando riba e periodo di Carnaval, pero ta enfoca hopi fuerte durante henter aña cu programanan hopi integral encuanto sexualidad y salud sexual den su totalidad na tur scol, pa asina por tin un miho impacto tambe.
No solamente e periodo di Carnaval. Esaki a bin ta funciona y ta mir’e tambe na e cifranan cu FP ta analisa di nan mes. Pero un overall tambe, trahando hunto cu CBS pa wak kico ta e impacto pa esaki. El a bin ta resulta hopi bon durante e ultimo 8 pa 9 añanan.
FPA ta kedando cu e formato eynan pero ta intensiva e trabaonan durante e periodo di Carnaval. Ta bin cu temanan diferente, tayernan un tiki unico pa asina por capta e extra atencion di e hoben.
FPA ta para p’e pa un programa integral encuanto sexualidad na e scolnan. No solamente un workshop y esey ta tur. Ta purba di traha cu tur scol, specialmente e scolnan secundario pa tin programanan fiho durante full e aña escolar.
E directora a agrega cu den transcurso di aña FPA a bin ta nota cu e fluho cu por duna e ora un servicio completo, dunando e ora un workshop integral na e scolnan, sigui cu nan ta bin bishita, pa e ora haya e extra guia, e guia mas personal, no solamente producto, pero e counseling y e guia personal tambe cu FPA ta keda brinda na nan.
FPA ta purba di tin un pakete completo pa asina tin un miho impacto pa no solamente hoben, pero adultonan tambe.
Cifra
Ras-Yarzagara a comenta cu nan ta trahando desde 2013 completamente digitalisa y automatisa. Na comienso di aña nan a pone metanan cu kier alcansa y wak e ora na fin di aña y midi esakinan durante mita di aña y naturalmente fin di aña wak si a logra esaki, con a logr’e, kico falta.
Naturalmente traha cu strategia pa asina por logra un impacto mas duradero tambe pa e comunidad di Aruba en cuanto nan salud sexual.
FPA ta midi e cifra di e clientenan cu ta bin cerca nan, di ki bario e ta, edad, scol y tambe dokter. Con el a bin FPA, con el a tende di nan. Ki tipo di producto e ta uza y asina tin nan sistema digitalisa.
E ta confidencial. E ta solamente pa FPA, pero ta midi e cifranan si y e impacto, e periodo tambe cu ta mas halto. Tambe proyectonan cu ta implementa, kico ta e impacto di e proyectonan y tambe ta wak atrabes di cifranan, si ta mira resultado si of no di cierto proyecto.
Ki proyecto FPA ta ripiti, ki proyecto ta adapta y ki proyecto automaticamente ta cay afo, pasobra e impacto ta menos.
Un ehempel tambe ta cu FPA ta analisando e aña cu ta tras di lomba cu ta 2019. Por bisa cu a caba awor aki. Tur cos ta wordo hinca den rapport pa e partnernan local, como tambe internacional cu ta traha cu nan pa e aspecto financiero.
FPA ta mira tambe un crecemento den nan clientela den su totalidad. FPA a crece cu 19.6%, si mester compara 2018 cu 2019. Esaki ta e total di clientenan cu tabata tin. E ora e parti di e hoben cu a atende tin un crecemento di 20.6%, compara 2018 cu 2019.
Di e hobennan aki, e hobennan nobo cu a bin pa prome biaha, registra na 2019, tin un crecemento di 22.1%. FPA ta sumamente contento cu e cifranan aki.
