Cantidad di contagionan di Covid-19 subiendo na Aruba

6631

Segun resumen di Departamento di Salubridad Publico Aruba (DVG), awe 16 persona a recupera, mientras cu di otro banda a registra un total di 25 caso nobo di Covid-19, di cual 3 ta no-residente. Como cu mas hende ta contagiando cu ta recuperando, ta haci cu e cantidad di casonan activo ta sigui subi y awe ta alcansa 124 caso. Pa algun dia nos tabata hasta bou di 100 caso, pero a presenta varios “kluster” atrobe.

E cantidad di testnan ehecuta ayera ta 449, cu ta haci cu e ‘positivity rate’ local riba dia di awe ta 14%. E cantidad di mortonan relaciona cu Covid-19 ta 45 persona.

Hospital a informa cu tin un total di 7 persona interna di cual 2 ta den Cuido Intensivo y 5 isola riba piso general.

E momento ta awor. Comunidad mester ta mucho mas alerto awor cu casonan ta subiendo atrobe. Nos no mester warda te ora cu e casonan cuminsa aumenta drasticamente atrobe pa cuminsa cuida nos mes mas.

Evita pa ta den gruponan di hende, evita aglomeracion, mantene distancia di 1.5 meter di otro, laba man mas frecuentemente of uza handsanitizer y es cuta malo porfabor keda cas y yama dokter di cas pa por test. E momento pa tuma accion ta awor. Aruba ta conta cubo!