Awe mainta Gobierno di Aruba a confirma cu e cantidad di casonan confirma di Coronavirus na Aruba ta sigui aumenta. For di 55 pa 60 caso y awe a raporta 2 caso extra, pa yega na un cantidad di 62 caso confirma riba nos isla.
Di acuerdo cu e website di Departamento di Salubridad Publico (DVG), un total di 774 test a sali negativo, pues ta hendenan cu tabatin sintoma pero di un griep normal, pues no Coronavirus. Di tur e casonan confirma, te awo ta solamente 1 di nan a recupera, cu ta e turista Mericano cu entretanto a regresa su pais caba. Danki Dios nos no tabatin ningun caso fatal riba nos isla.
Gobierno a informa tambe cu ainda tin 1 resultado pendiente, pues cu no a haya un contesta conclusivo ainda for di laboratorio. Si conta tur hende hunto, Aruba a test un total di 837 hende pa Coronavirus. Pa loke ta esunnan cu no tin sintoma ainda, pero tabata den contacto cu hendenan contagia of a bin di un pais cu tin Coronavirus, a alcansa na un total di 562 persona cu ta den cuarentena.
Ta pidi comunidad pa hunto nos proteha nos mes pa mas plamamento di e virus. Si bo ta sinti sintomanan di griep manera keintura, tosamento of problema pa hala rosea, por fabor tene cuenta cu lo siguiente:
- Si bo tin mayornan, welo/ wela, tanta/omo grandi, por fabor no bay haci bishita.
- Si bo famia ta den un cas di cuido, por fabor no bay bishitanan
- Tuma contacto via telefon cu bo grandi y splica pakico bo lo no por bin di bishita
- Por fabor como famia traha un plan hunto con pa prepara pa yuda y proteha un famia di edad halto. Sea ta cu alimentacion, suplemento, hopi awa y pa nan tambe laba man y haci uzo di hand sanitizers cu ta contene por lo menos 60% di alcohol.
Si bo persona tin sospecho cu bo famia di edad halto por tin Coronavirus: YAMA DOKTER DI CAS Y/OF E CORONAVIRUS CALL CENTER NA #280-0101.
