Un rato pasa pa 8:15pm a sosode un simpel accidente na Paradera net na e t-kruising dilanti Anytime Bar and Restaurant. Na yegada Polis a topa cu un auto marca KIA modelo Sportage color blanco cu pa motibo desconoci a baha caminda drenta mondi. Polis a tuma dato di e chauffeur y a move. Despues cu Polis a bay, e acidente a transforma den un caso mucho mas complica, ora e chauffeur femenino a nenga pa Forensys atende e accidente y a dal e trahado un wanta den cara.
Durante e agresion, e bril di e empleado a kita for di su cara y cay na suela. Asina mes e trahado a mantene su postura y a opta pa no contesta e agresion. Pero comosifuera un bofta no tabata suficiente, e chauffeur a bolbe dal e trahado un otro wanta mas den cara. E mucha muhe a hasta trompica y cay despues di e di dos agresion.
Mesora un homber cu tabata cu e dama a tene e dama na su man y a aleha for di e sitio y a cana drenta un auto. Polis a yega atrobe rapidamente pero e dama a nenga di a agredi e trahado.
Mirando e declaracion di varios testigo, Polis a deten’e asina mes. Debi cu e no kier a sali boluntariamente, polis a haya nan mes ta saca e sospechoso nan mes for di e auto y hinc’e den patruya. Na ward’i polis a test’e y a resulta cu e ta burachi y obviamente agresivo tambe!
