Locual antes tabata un mision imposibel, cu tempo a bira un soño, despues un realidad y awendia un “trend”, di cual Tumberonan di Aruba ta bay purba nan suerte den e Festival di Tumba na Corsou. E aña aki atrobe e cantidad di participantenan ta sigui crece. Tin ta bisa cu e premio ta miho na Corsou mientras cu e mayoria gusta e forma di aregla, letra y melodia cu cual Corsou ta prepara su tumbanan di carnaval.
For di Aruba e aña aki, ya riba dialuna e prome dia di prefinal, lo presenta John Francis Jacobs cu e banda K’ribe. E lo presenta su tumba “Djaki te aya”, un composicion di Albertico “Tico” Libieey cu areglo di John Francis Jacobs mes.
Riba diaranson, e di tres dia di prefinal, lo presenta e cantante Quincy Hasham cu e banda WESU. Su tumba ta titula “Pone cos zona”, un composicion di Ced Ride y areglo di Hector Sampson.
E mesun dia, net despues di WESU, e banda di Aruba, esta Buleria, lo subi escenario cu su elenco di cantantenan. Entrenan Chendell Beaumont cu lo canta e tumba “Rosea”, un compsicion di Chendell mes y areglo di Raul Piar. Ta sigui Rocco Franken cu “Hey”, un composicion di Hendrik de Windt (Ex Rey di Tumba) y areglo di Dwight Leoneta.
E anochi final lo ta diabierna 26 di januari 2017 den Curacao Festival Center. Esunnan cu kier bay mester reserva lihe, pasobra aunke ticket tin na cantidad, e cuponan di pasashi si ta limita.
