Den un conferencia di prensa e cantante Odillia a conta di su aliansa cu fundacionnan local cu e meta pa recauda fondo pa yuda e institucionnan sigui cu e bon trabou cu nan ta haciendo pa personanan special of cu necesidad.
Ta trata di un evento pa recauda fondo cu ta tuma luga e fin di siman aki den forma virtual.
Por corda cu Odillia tabata na Aruba pa grabacion di su video, hunto cu e cantante Snoop Dogg, y e artista ta corda cu el a haya un trato sublime. Esey ta e motibo cu e biaha aki su team kier a haci of duna algo pa encurasha otronan tambe pa contribui.
“Mi tin un curason debil pa muchanan cu necesidadnan special y muchanan den sociedad cu ta wordo laga atras, kendenan mester di mas atencion y ayudo di otronan. P’esey mi a bishita diferente fundacion desde cu mi ta na Aruba y a busca ideanan con mi por yuda,” e cantante a bisa.
Asina e surgi e idea pa bini cu un evento pa recauda fondo, cual lo tuma luga den forma virtual na television y via di Facebook. A haya cooperacion di diferente personalidad di espectaculo y media, manera COOL FM pa haci e evento realidad.
E ta cuminsa di 4.30 di atardi y ta sigui te 8’or di anochi. Durante e evento ta recauda fondo di tur sorto di forma – placa, cuminda,paña, of cualkier tipo di material cu e muchanan por uza. Tur loke cu ricibi ta bay distribui entre diferente fundacion den colaboracion cu Trampolin pa trabou”.
